హైదరాబాద్: దీర్ఘ కాలంగా కిడ్నీ ఫెయిల్యూర్ తో బాధ పడుతున్న రోగులకు నిమ్స్ వైద్యులు కిడ్నీ మార్పిడి శస్త్రచికిత్సతో విశేష సేవలు అందిస్తున్నారు. ఈ సంవత్సరం నూరవ కిడ్నీ మార్పిడి చికిత్సను విజయవంతంగా పూర్తి చేసారు. దేవరపల్లి, చేవేళ్లకి చెందిన లక్ష్మమ్మ అనే మహిళ.. తన కుమారుడు శేఖర్ కి కిడ్నీ దానం చేసింది. హాస్పిటల్ లో జరిగిన ఈ 100 వ ఆపరేషన్ సక్సెస్ అయిందని.. తల్లి కొడుకులు ప్రస్తుతం కోలుకుంటున్నారని డాక్టర్లు ఈ సందర్భంగా తెలిపారు.
గత నాలుగు సంవత్సరాల నుంచి ప్రతి సంవత్సరం వందకు పైగా కిడ్నీ ట్రాన్స్ ప్లాంట్ ఆపరేషన్ జరిగాయని, గత 8 సంవత్సరాలలో 700 పైగా చికిత్సలు విజయవంతంగా జరిగాయన్నారు వైద్యులు. నిమ్స్ యూరాలజీ వైద్యులు ప్రొఫెసర్ రాంరెడ్డి(HOD) , ప్రొఫెసర్ రాహుల్ దేవరాజ్ ,డాక్టర్ విద్య సాగర్ , డాక్టర్ రామ్ చంద్రయ్య, డాక్టర్ రఘువేర్, డాక్టర్ చరణ్ ఈ ఆపరేషన్ లలో కీలక పాత్ర వహించారు.
ఈ సందర్భంగా ప్రొఫెసర్ రాంరెడ్డి… తెలంగాణ ప్రభుత్వానికి,నిమ్స్ డైరెక్టర్ డాక్టర్ మనోహర్ కి ,మెడికల్ సూపెరిండెండెంట్ డాక్టర్ నిమ్మ సత్యనారాయణ గారికి కృతజ్ఞతలు తెలిపారు.
