హసన్ పర్తి, వెలుగు : కేయూ ఎగ్జామినేషన్ బ్రాంచ్ లో వారం కిందట జరిగిన మాల్ ప్రాక్టీస్ కేసులో 11 మంది ఔట్ సోర్సింగ్ సిబ్బందిని అరెస్ట్ చేసి రిమాండ్ కు తరలించినట్లు సీఐ సంజీవ్ తెలిపారు. కాకతీయ యూనివర్సిటీ పోలీస్ స్టేషన్లో సోమవారం కేసు వివరాలను ఆయన వెల్లడించారు. ‘‘కేయూ ఎగ్జామినేషన్ బ్రాంచ్లో కొన్నేళ్లుగా ఔట్ సోర్సింగ్ సిబ్బంది పనిచేస్తున్నారు. డిగ్రీ విద్యార్థులు పరీక్ష రాసిన తర్వాత జవాబు పత్రాలను అక్కడే భద్రపర్చి సీల్ వేస్తారు. ఫెయిల్ అవుతామనే ఆలోచనలో ఉన్న కొందరు విద్యార్థులకు జవాబు పత్రాలను బయటకు తీసి సిబ్బంది అందించేవారు.
జవాబులు రాసిన తర్వాత యథాతథంగా పెట్టేవారు. ఇందుకోసం డబ్బులు తీసుకునేవారు. ఈ తతంగం కొన్నేళ్లుగా జరుగుతోంది. మే 23న అందులో పనిచేస్తున్న మాదాసి సునీల్, గడ్డం రాణా ప్రతాప్, నాసం శ్రీధర్ జవాబు పత్రాలు తీస్తుండగా, సీసీ ఫుటేజ్లో రికార్డు కావడంతో విషయం వెలుగులోకి వచ్చింది. కాకతీయ యూనివర్సిటీ అధికారుల ఫిర్యాదు మేరకు కేసు నమోదు చేసి దర్యాప్తు చేపట్టాం. ఈ ప్రక్రియలో ఔట్ సోర్సింగ్ ఉద్యోగులతో పాటు వివిధ కాలేజీలకు చెందిన విద్యార్థులు పెద్ద సంఖ్యలో ఉన్నట్లు గుర్తించాం.
కేసుతో సంబంధం ఉన్న 11 మంది ఔట్ సోర్సింగ్ , దినసరి కూలీలను సోమవారం అరెస్టు చేసి రిమాండ్కు తరలించాం. యూనివర్సిటీ ఉద్యోగుల పాత్ర పైనా అనుమానాలు వ్యక్తం అవుతున్నాయని, త్వరలోనే మిగతా వ్యక్తులను అరెస్టు చేస్తాం”అని సీఐ వెల్లడించారు.
