మిడ్డే మీల్స్వికటించి.. 12 మందికి అస్వస్థత
జడ్పీ హై స్కూల్ లో ఉడకని అన్నం, గుడ్డు
చండ్రుగొండ, వెలుగు : భద్రాద్రి కొత్తగూడెం జిల్లా చండ్రుగొండ మండలం పోకలగూడెం జడ్పీ హై స్కూల్ లో మిడ్ డే మీల్స్ వికటించి సోమవారం 12 మంది స్టూడెంట్స్ అస్వస్థత కు గురయ్యారు. ఈ స్కూల్ లో మొత్తం 147 మంది స్టూడెంట్స్ ఉండగా.. సోమవారం 111 మంది అటెండ్ అయ్యారు. బాలల దినోత్సవం సందర్భంగా ఆటల పోటీల అనంతరం వారు మిడ్డే మీల్స్ చేశారు. రైస్తో పాటు గుడ్డు, పప్పుచారు పెట్టారు. తిన్న తర్వాత కొంత సేపటికి పలువురు స్టూడెంట్స్ గొంతు నొప్పి, దగ్గుతో పాటు చాతినొప్పి, వాంతులతో ఇబ్బంది పడ్డారు. అన్నం , గుడ్డు సరిగ్గా ఉడకకపోవడం, చారు నీళ్ళలాగా ఉండడంవల్లనే అస్వస్థతకు గురయినట్టు చెప్తున్నారు.
తీవ్ర అస్వస్థతకు గురైన బి.నందిని, కర్ణ, అనురాధ, సిద్దార్థ, హర్ష, సింధు, ఆనంది, గౌతమ్, ఊహాజనని, మహేశ్వరి, కార్తీక్, జానకిలను ఆటోలో చండ్రుగొండ పీహెచ్సీకి తరలించారు. మెడికల్ ఆఫీసర్ ప్రవీణ్ ప్రకాశ్ , సిబ్బంది స్టూడెంట్స్ కి వైద్యం అందించారు. ఫుడ్ పాయిజన్ వల్ల అస్వస్థతకు గురయ్యారని, వారికి ఎలాంటి ప్రమాదం లేదని మెడికల్ ఆఫీసర్ ప్రవీణ్ ప్రకాశ్ తెలిపారు.
