- కొన్నేండ్ల క్రితమే గేటుకు తుప్పు పట్టినా.. రిపేర్లు చేయని ఆఫీసర్లు
- ఎన్నికల వేళ పాలేరుకు నీటిని విడుదల చేయడంతో ప్రమాదం
మునగాల, వెలుగు: నాగార్జున సాగర్ ఎడమ కాల్వ కింద వందల ఎకరాల్లో చేతికొచ్చిన పంట నీటమునిగింది. సూర్యాపేట జిల్లా మునగాల సమీపంలో(113 కిలో మీటర్ వద్ద) ఉన్న ఎస్కేప్ షటర్(గేటు) పగిలిపోయి, కొట్టుకపోయింది. దీంతో నీరు ఒక్కసారిగా కట్టలు తెంచుకొని పోలేనుగూడెం, బేతవోలు, మునగాల పరిధిలోని వెయ్యి నుంచి1200 ఎకరాల్లోని వరి పొలాలను ముంచింది. ఎస్కేప్గేటుకు తుప్పుపట్టి ఏండ్లు గడుస్తున్నా, మరమ్మతులు చేపట్టకపోవడం, ఎన్నికల వేళ పాలేరు రిజర్వాయర్కు నీటిని విడుదల చేయడంతో ఈ ప్రమాదం జరిగినట్లు తెలుస్తోంది.
ఎస్కేప్ షటర్ను దాదాపు15 ఏండ్ల క్రితం ఏర్పాటు చేశారు. కాలక్రమేణా అది తుప్పు పట్టిపోయింది.కెనాల్కు లైనింగ్ వేసే సమయంలో అప్పటికే తుప్పు పట్టిన షటర్కు రిపేర్లు చేయాలని రైతులు కోరినా ఆఫీసర్లు పట్టించుకోలేదు. ఈసారి ఎడమకాలువ ఆయకట్టుకు నీళ్లు ఇవ్వకపోవడంతో షటర్ ను ఎవరూ పట్టించుకోలేదు. ఎన్నికల దృష్ట్యా ప్రభుత్వం పాలేరు రిజర్వాయర్ కు తాగునీటి అవసరాల పేరిట 4 రోజుల క్రితం ఎడమ కాలువకు నీటిని విడుదల చేసింది.
ఈ సమయంలో కెనాల్లో సుమారు 19 అడుగుల మేర అంటే 6,400 క్యూసెక్కులు నీరు వస్తోంది. ఈ వరద ఉధృతికి తుప్పు పట్టి ఉన్న ఎస్కేప్ షటర్ పగిలిపోయి నీటిలో కొట్టుకుపోయింది. ఖమ్మం జిల్లాకు నీటిని తరలిస్తుండగానల్గొండ, సూర్యాపేట జిల్లాల్లో రైతులెవరూ షటర్లు ఎత్తకుండా అన్ని చోట్లా సిబ్బందిని కాపలా పెట్టారు. కాగా, షటర్ఒక్కసారిగా కొట్టుకుపోతున్నప్పుడు వచ్చిన శబ్దం విని సిబ్బంది ఉలిక్కిపడ్డారు. విషయాన్ని ఉన్నతాధికారులకు తెలియజేశారు. ఎన్ఎస్పీ ఆఫీసర్లు ఎస్సీ నరసింహా, ఎస్ఈ సత్యనారాయణ, డీఈ రఘు, ఏఈ సత్యనారాయణ చేరుకొని పరిశీలించి నీటి విడుదల బంద్పెట్టారు.
అప్పటికే సుమారు1500 క్యూసెక్కుల నీరు ముంచెత్తడంతో బేతవోలు ఎస్కేప్ కింద ఉన్న పోలేనుగూడెం, బేతవోలు, మునుగాల గ్రామాల పరిధిలోని సుమారు1000 నుంచి1200 ఎకరాల దాకా వరి పంట నీట మునిగింది. పాత షటర్స్థానంలో కొత్తది ఏర్పాటు చేసేందుకు చర్యలు తీసుకుంటున్నామని, ఈలోగా ప్రభుత్వం పాలేరుకు నీరు విడుదల చేయడంతో ప్రమాదం జరిగిందని ఆఫీసర్లు చెబుతున్నారు. చేతికొచ్చిన పంట నీట మునిగిందని, దానికి నష్ట పరిహారం చెల్లించేందుకు ఆఫీసర్లు చర్యలు తీసుకోవాలని బాధిత రైతులు కోరుతున్నారు.
