- మరో 50 మందికిపైగా గాయాలు
- బోల్తాపడిన ట్యాంకర్ నుంచి పెట్రోల్
- తీసుకెళ్లేందుకు జనం ప్రయత్నిస్తుండగా మంటలు
జిగావా(నైజీరియా): నైజీరియాలో ఘోర ప్రమాదం జరిగింది. పెట్రోల్ ట్యాంకర్ పేలి 140 మంది ప్రాణాలు కోల్పోయారు. 50 మందికి గాయాలు కాగా ఆస్పత్రులకు తరలించారు. జిగావా రాష్ట్రంలోని మజియా టౌన్లో బోల్తాపడిన ట్యాంకర్ నుంచి పెట్రోల్ తీస్కెళ్లేందుకు జనం ప్రయత్నిస్తుండగా ఈ ప్రమాదం జరిగింది.
పెట్రోల్ తీస్కెళ్లేందుకు జనంఎగబడ్డరు..
మంగళవారం అర్ధరాత్రి హైవేపై ప్రయాణిస్తుండగా డ్రైవర్ కంట్రోల్ తప్పడంతో ట్యాంకర్ బోల్తా పడింది. లీకవుతున్న పెట్రోల్ తీసుకెళ్లేందుకు స్థానికులు పెద్ద సంఖ్యలో ట్యాంకర్ను చుట్టుముట్టారు. బిందెలు, బకెట్లలో పెట్రోల్ నింపుకునేందుకు ప్రయత్నిస్తుండగా ఒక్కసారిగా పేలుడు సంభవించింది. పెద్ద ఎత్తున మంటలు ఎగిసిపడ్డాయి. దీంతో 97 మంది అక్కడికక్కడే సజీవ దహనమయ్యారు.
కాలిన గాయాలతో ఆస్పత్రిలో ట్రీట్మెంట్ పొందుతూ మరో 43 మంది చనిపోయారు. ప్రమాదం జరిగిన తర్వాత కొన్ని గంటలదాకా మంటలను ఆర్పడం సాధ్యం కాలేదని అధికారులు తెలిపారు. గుర్తుపట్టలేని పరిస్థితుల్లో ఉన్న మృతదేహాలకు బాధితుల బంధువులంతా కలిసి బుధవారం సామూహిక అంత్యక్రియలు నిర్వహించారు.
