సూర్యాపేట, వెలుగు : పార్లమెంట్ ఎన్నికల ముందు సూర్యాపేటలో బీఆర్ఎస్కు గట్టి దెబ్బ తగిలింది. ఆ పార్టీకి చెందిన 15మంది అసమ్మతి కౌన్సిలర్లు సోమవారం బీఆర్ఎస్కు రాజీనామా చేశారు. మున్సిపల్ చైర్ పర్సన్ అన్నపూర్ణ, వైస్ చైర్మన్ పుట్ట కిషోర్పై బీఆర్ఎస్పార్టీ అసమ్మతి కౌన్సిలర్లు అవిశ్వాసం పెట్టడంతో ఆదివారం ఇద్దరిని పార్టీ నుంచి సస్పెండ్ చేశారు. దీంతో మిగిలిన 13 మంది కూడా రిజైన్ చేశారు. సోమవారం వారు జిల్లా కేంద్రంలో మీడియా సమావేశం నిర్వహించి మాట్లాడారు.
సూర్యాపేటలో అభివృద్ధి మాటున చేసిన అవినీతిని ప్రశ్నించినందుకే పార్టీ నుంచి బహిష్కరించారని 32వ వార్డు కౌన్సిలర్ కొండపల్లి నిఖిల దిలీప్ రెడ్డి ఆరోపించారు. ఎదిగితే జగదీశ్రెడ్డికి నచ్చదని, వారిని అణచివేస్తారన్నారు. కనీసం తమ వార్డుల్లో జరిగిన అభివృద్ధి పనుల శిలాఫలకాలపై కూడా తమ పేర్లు పెట్టేందుకు అంగీకరించలేదన్నారు.
బీఆర్ఎస్అహంకారానికి ప్రజలు గుణపాఠం చెప్పారని, ఇక్కడ కూడా అలాంటి సమయం వస్తుందన్నారు. జగదీశ్ రెడ్డి మూడు సార్లు గెలిస్తే తమ వల్లే ఆయనకు మున్సిపాలిటీలో ఓట్లు పడ్డాయన్నారు. కౌన్సిలర్లు బచ్చలకూరి శ్రీనివాస్, జహీర్, ఎలిమినేటి అభినయ్, అనపర్తి రాజేశ్, అనంతుల యాదగిరి, రాపర్తి శ్రీనివాస్, మామిడి గౌరయ్య, జ్యోతి కరుణాకర్, రవి నాయక్, నాయకులు గండూరి రమేశ్, లింగానాయక్, సిరివెళ్ల శబరి, కుంభం రాజేందర్, మకట్ లాల్ ఉన్నారు.
