బరేలి (యూపీ): ఉత్తరప్రదేశ్ సంభాల్ జిల్లా చాందౌసి టౌన్లో 150 ఏండ్ల నాటి మెట్ల బావి బయటపడింది. ఇది లక్ష్మణ్ గంజ్ ఏరియాలో కనుగొన్నారు. రెండు రోజులుగా తవ్వకాలు చేపడ్తున్నారు. ఈ మెట్ల బావి.. బ్యాంకే బిహారి ఆలయానికి కనెక్ట్ అయి ఉండొచ్చని అధికారులు అనుమానిస్తున్నారు. ఆలయాన్ని పునరుద్ధరిస్తామన్నారు. అవసరమైతే చుట్టుపక్కల ఉన్న ఆక్రమణలు తొలగిస్తామని తెలిపారు. ఈ మెట్ల బావి ఎన్నేండ్ల కింద కట్టారు? ఎవరు నిర్మించారో తెలుసుకునేందుకు ఆర్కియాజికల్ సర్వే ఆఫ్ ఇండియాకు లేఖ రాస్తామన్నారు. కాగా, లక్ష్మణ్ గంజ్ లో బయటపడిన ఈ మెట్ల బావి చుట్టుపక్కల ఎక్కువగా ముస్లింలు నివాసం ఉంటున్నారు.
బ్యాంకే బిహారి టెంపుల్కు అతికొద్ది దూరంలోనే ఈ మెట్ల బావి బయటపడింది. మొత్తం బావిని వెలికి తీసేందుకు తవ్వకాలు కొనసాగిస్తున్నారు. అయితే, రెవెన్యూ డిపార్ట్మెంట్ రికార్డుల ప్రకారం.. మెట్ల బావి సుమారు 400 మీటర్ల మేర విస్తరించి ఉండొచ్చని తెలుస్తున్నది. చెరువుగా రిజిస్టర్ అయినట్లు సమాచారం. బిలారీ రాజు తాతల కాలంలో ఈ మెట్ల బావి కట్టారని స్థానికులు చెప్తున్నారు. మొత్తం మూడు లెవల్స్లో ఉండొచ్చని తెలిపారు. ఫస్ట్ లెవల్ ఇటుకలతో, మిగిలిన రెండు లెవల్స్ మార్బుల్స్ కట్టినట్లు చెప్పారు. బావితో పాటు నాలుగు గదులు కూడా ఉన్నట్లు వివరించారు. ఈ మెట్ల బావికి 150 ఏండ్ల చరిత్ర ఉన్నట్లు చెప్తున్నారు.
