- తీర్మానం లేకుండానే చేయని పనులకు బిల్లులు
- చర్యలకు సిద్ధం అవుతున్న ఉన్నతాధికారులు
మహబూబ్నగర్, వెలుగు : గత ప్రభుత్వ హయాంలో కొందరు సర్పంచులు గ్రామ పంచాయతీల ఫండ్స్ను పక్కదారి పట్టించారు. గ్రామ సభలలో తీర్మానం లేకుండానే చేయని పనులకు బిల్లలు తీసుకున్నారు. ఇందుకు పంచాయతీ సెక్రటరీలూ సహకరించారు. తాజాగా మహబూబ్నగర్ జిల్లా జడ్చర్లలోని పోలేపల్లి జీపీలో రూ.1.70 కోట్ల ఫ్రాడ్ జరిగినట్లు తెలిసింది. వీటికి సంబంధించి ఎంబీ రికార్డులు, ఓచర్లు, బిల్లులు లేకపోవడంతో బాధ్యులపై సర్కారు యాక్షన్ తీసుకునేందుకు సిద్ధం అవుతోంది.
రికార్డులు అప్పగించకపోవడంతో..
గత జులైలో సర్కారు ప్రభుత్వ ఉద్యోగులకు జనరల్ ట్రాన్స్ఫర్స్ నిర్వహించింది. ఇందులో భాగంగా పంచాయతీ సెక్రటరీలు ఇతర ప్రాంతాలకు ట్రాన్స్ఫర్ అయ్యారు. అయితే పోలేపల్లికి చెందిన సెక్రటరీ శివప్రకాశ్ ఇదే జిల్లాలోని హన్వాడ మండలం అమ్మాపూర్ తండాకు ట్రాన్స్ఫర్ అయ్యారు. ఈయన స్థానంలో లక్ష్మీనారాయణ జులై 20న పోలేపల్లి సెక్రటరీగా బాధ్యతలు తీసుకున్నారు.
అప్పటి నుంచి శివప్రకాశ్ ఈ జీపీకి సంబంధించిన రికార్డులు లక్ష్మీనారాయణకు అప్పగించలేదు. దీనిపై కొత్త సెక్రటరి పలుమార్లు ఉన్నతాధికారులకు ఫిర్యాదు చేయగా.. వారు స్పందించి ఆగస్టులో శివప్రకాశ్కు మెమో జారీ చేశారు. మూడు రోజుల్లో రికార్డుల అప్పగిస్తామని చెప్పిన శివప్రకాశ్.. ఎంతకూ వాటిని అప్పగించకపోవడంతో మండల పంచాయతీ ఆఫీసర్.. జిల్లా పంచాయతీ ఆఫీసర్కు కంప్లైంట్ చేశారు. దీంతో ఈ విషయం కలెక్టర్కు దృష్టికి చేరింది. అయితే రికార్డులకు సంబంధించిన విచారణ చేయాలని ఇటీవల ఉన్నతాధికారుల నుంచి డీఎల్పీఓకు ఆదేశాలొచ్చినట్లు సమాచారం.
రూ. 1.73 కోట్ల నిధులకు ఆధారాల్లేవ్
గ్రామ పంచాయతీల్లో వివిధ అభివృద్ధి కార్యక్రమాల కోసం జీపీ నిధులు, స్టేట్ ఫైనాన్స్ కమిషన్ (ఎస్ఎఫ్సీ), సెంట్రల్ ఫైనాన్స్ కమిషన్ (సీఎఫ్సీ), విలేజ్ వాటర్ అండ్ శానిటేషన్ కమిటీ (వీడబ్ల్యూఎస్సీ), ఎన్ఆర్ఈజీఎస్ కింద ఏటా నిధులు మంజూరవుతాయి. ఈ నిధులను గ్రామ పంచాయతీ ఆమోదం ద్వారా వినియోగించాల్సి ఉంటుంది. కానీ 2019-–20 నుంచి 2023-–24 ఫినాన్షియల్ ఇయర్ వరకు ఈ ఫండ్స్ కింద పోలేపల్లి జీపీలో రూ.7.03 కోట్ల వరకు ఖర్చు చేయగా.. ఇందులో 1.73 కోట్లకు సంబంధించి గ్రామ సభ ఆమోదం లేకుండా నిధులు డ్రా చేసినట్టు ఆఫీసర్ల ఎంక్వైరీలో బయటపడింది.
2019–-20 నుంచి 2023–-24 వరకు హరితహారం మొక్కలు కొనుగోలు చేసినట్లు ఫేక్ బిల్లులు పెట్టి రూ.30 లక్షలు డ్రా చేసుకున్నట్లు సమాచారం. 'పల్లె ప్రగతి'లో భాగంగా పారిశుధ్య పనులు, పిచ్చి మొక్కల తొలగింపు, పాత ఇండ్ల కూల్చివేతల కోసం జేసీబీకి రూ.25 లక్షలు, సీసీ రోడ్లకు రూ.16.70 లక్షలు, యానిమల్ క్యాచింగ్ ఖర్చుల కింద రూ.3.17 లక్షలు, సివిల్ వర్కులు, సీసీ రోడ్లు, అండర్ గ్రౌండ్ డ్రైనేజి, ఇతర పనులు చేసినట్లు రూ.33.77 లక్షలు, ఎలాంటి బిల్లుల లేకుండా వివిధ పద్దుల కింద రూ.16.13 లక్షలు, వీడబ్ల్యూఎస్సీ అడ్వాన్సులు రూ.9.24 లక్షలు, ఎన్ఆర్ఈజీఎస్ కింద హరితహారం మొక్కలకు ట్యాంకర్ ద్వారా నీటిని అందించినందుకు రూ.14.75, నర్సరీ నిర్వహణ ఖర్చు కింద రూ.3.80 లక్షలు డ్రా చేసుకున్నట్లు తెలిసింది.
అయితే వీటిన్నటికి గ్రామ సభ ఆమోదం లేకపోవడం, కలెక్టర్, డీపీఓ, ఇంజనీరింగ్ ఆఫీసర్లు, ఇతర మండల స్థాయి ఆఫీసర్ల ఆమోదం లేకుండా నిధులు డ్రా అయినట్టు సమాచారం. ఈ నిధులను రికవరీ చేయడంతో పాటు బాధ్యులపై చర్యలు తీసుకునేందుకు ఉన్నతాధికారులు సిద్ధం అవుతున్నారు.
కాగా.. పోలేపల్లి గ్రామ పంచాయతీకి సంబంధించిన రికార్డులను ట్యాంపరింగ్ చేసే ప్రయత్నాలు జరుగుతున్నాయని ఇటీవల జడ్చర్ల ఎమ్మెల్యే జనంపల్లి అనిరుధ్ రెడ్డి ఆరోపించారు. గత ప్రభుత్వ హయాంలో ఈ పంచాయతీ పరిధిలో పలు అక్రమాలు చోటు చేసుకున్నాయని.. సెక్రటరీగా పని చేసిన శివ ప్రసాద్ పంచాయతీ రికార్డులు అప్పగించకపోవడంపై అనుమానాలు ఉన్నాయన్నారు. ఈ విషయంపై జిల్లా పంచాయతీ ఆఫీసర్ ఫిర్యాదు చేసిన చర్యలు తీసుకోలేదని.. ఉన్నతాధికారులకు కంప్లైంట్ చేస్తానని గత వారం ప్రెస్మీట్లో స్పష్టం చేశారు. ఇందుకు స్పందించిన ఉన్నతాధికారులు పంచాయతీలో జరిగిన అవకతవకలపై తాజాగా విచారణ చేపట్టారు.
