- ఓవర్ లోడ్తో టైర్ నుంచి పొగలు
- అప్రమత్తమై ఆపేసిన డ్రైవర్
- వేరే బస్సుల్లో గమ్యస్థానాలకు...
ధన్వాడ. వెలుగు : మహాలక్ష్మి స్కీంతో మహిళలకు ఉచిత ప్రయాణం కల్పించడంతో బస్సులన్నీ కిక్కిరిసిపోతున్నాయి. మహబూబ్నగర్ జిల్లాలోని ధన్వాడలో బుధవారం ఓ పల్లెవెలుగు బస్సులో 182 మంది మహిళలు ప్రయాణించడంతో బస్సు టైర్లలోంచి పొగలు వచ్చి నిలిచిపోయింది. ప్రయాణికుల కథనం ప్రకారం..మహబూబ్నగర్ డిపోకు చెందిన పల్లె వెలుగు బస్సు (టీఎస్ 06 యూపీ 3411) బుధవారం ఉదయం మహబూబ్నగర్ నుంచి 182 మంది ప్రయాణికులతో నారాయణపేటకు బయలుదేరింది.
జేపీఎన్ సీఈ ఇంజినీరింగ్ కాలేజీ వద్ద సుమారు 30 నుంచి 40 మంది స్టూడెంట్లు దిగారు. తర్వాత స్టేజీలో మరికొంతమంది మహిళలు ఎక్కారు. దీంతో బస్సు ఓవర్లోడ్అయి మరికల్కు వెళ్లాక వెనక టైర్ నుంచి పొగలు రావడం మొదలైంది. ధన్వాడకు వచ్చాక పొగ ఎక్కువై కాలిన వాసన వచ్చింది. దీంతో డ్రైవర్అప్రమత్తమై బస్సు ఆపేశాడు. అక్కడే ప్రయాణికులందరినీ దింపేసి వేరే బస్సుల్లో వారి గమ్యస్థానాలకు తరలించారు.
