భద్రాచలం, వెలుగు: చత్తీస్గఢ్ లోని బీజాపూర్జిల్లాలో జరిగిన ఎన్కౌంటర్ లో ఇద్దరు మావోయిస్టులు మృతి చెందారు. బాసగూడ పరిధిలోని నేండ్ర అటవీ ప్రాంతంలో డీఆర్జీ, కోబ్రా, యంగ్ప్లాటూన్లతో కూడిన బలగాలు శుక్రవారం కూంబింగ్నిర్వహించాయి. నేండ్ర- పున్నూరు అటవీ గ్రామాల మధ్య మావోయిస్టు దళాలకు, బలగాలకు మధ్య ఎదురెదురు కాల్పులు జరిగాయి. ఈ ఘటనలో ఇద్దరు మావోయిస్టులు చనిపోయారు.
వారి మృతదేహాలతో పాటు ఘటనాస్థలం నుంచి12బోర్ సింగిల్షాట్ గన్, ఒక స్వదేశీ గన్, 5 కిలోల టిఫిన్బాక్సు బాంబు, ప్రింటర్, విప్లవ సాహిత్యం, ఇతర నిత్యావసర సరుకులను బలగాలు స్వాధీనం చేసుకుని బాసగూడ పోలీస్స్టేషన్కు తరలించారు. చనిపోయినవారిని కవాసి హంగా, సోమద కల్మగా అధికారులు గుర్తించారు. వీరిపై పలు పోలీస్ స్టేషన్ లలో పలు కేసులతోపాటు లక్ష రూపాయల రివార్డ్ కూడా ఉన్నట్లు వివరించారు.
మరో వైపు.. అబూజ్మాఢ్ ఏరియాలో గురువారం జరిగిన ఎన్కౌంటర్ లో మృతి చెందిన ఏడుగురు మావోయిస్టుల మృతదేహాలను బైరంగఢ్ పోలీస్స్టేషన్కు తీసుకొచ్చారు. వీరిని కూడా గుర్తించాల్సి ఉంది. కేవలం రెండు రోజుల్లో 9 మంది మావోయిస్టులను బలగాలు చంపేశాయి.
