తెలంగాణ కిచెన్ : రాఖీ పండుగ​ స్పెషల్..వెరైటీ స్వీట్స్

ఇదివరకు రోజుల్లో రాఖీ పండుగ వస్తుందంటే... నోరు తీపి చేసుకునేందుకు ఇంట్లోనే  స్వీట్లు తయారుచేసేవాళ్లు. కానీ ఇప్పుడు అన్నింటిలో మార్పులు వస్తున్నట్టే వంటకాల్లో, రుచుల్లో కూడా మార్పులు వచ్చేశాయి. అలా స్వీట్స్​కి వచ్చి చేరిన కొత్త రుచులే ఈసారి రాఖీ పండుగ​ స్పెషల్. వాటిలో కొన్ని వెరైటీ స్వీట్స్​ ఇవి.. 

చాకొలెట్ - బిస్కెట్ స్వీట్

కావాల్సినవి :

చాకొలెట్ క్రీమ్ బిస్కెట్స్ - ఇరవై ఐదు
బాదం, జీడిపప్పు పలుకులు - రెండు టేబుల్ స్పూన్లు, యాలకుల పొడి - అర టీస్పూన్, 
నెయ్యి - ఒక టేబుల్ స్పూన్
పాలు - ఒక కప్పు

తయారీ : మిక్సీజార్​లో బిస్కెట్స్  వేసి మెత్తగా గ్రైండ్ చేయాలి. ఆ పొడిని ఒక గిన్నెలో వేసి అందులో బాదం, జీడిపప్పు పలుకులు, యాలకుల పొడి, నెయ్యి వేసి కలపాలి. ఆ తర్వాత పాలు పోసి మరోసారి బాగా కలిపి ముద్దగా చేయాలి. ఆ మిశ్రమాన్ని చిన్న ఉండలుగా చేయాలి. ఒక్కో ఉండను అరచేతిలో పెట్టి వత్తాలి. దానిపై వేలితో నొక్కి అందులో డ్రై ఫ్రూట్స్ పలుకులు వేస్తే చాకొలెట్​ బిస్కెట్​ రెడీ. చాలా ఫాస్ట్​ అండ్​  సింపుల్​ కదా ఈ  రెసిపీ.

చాకొలెట్ - పీనట్ బాల్స్

కావాల్సినవి :

పల్లీలు - అర కప్పు, బిస్కెట్స్ - నాలుగు
చాకొలెట్ (కరిగించి) - ముప్పావు కప్పు

తయారీ : నూనె వేయకుండా పల్లీలు వేగించాలి. మిక్సీజార్​లో బిస్కెట్స్, వేగించిన పల్లీలు వేసి పొడిపట్టాలి. ఆ పొడిని ఒక గిన్నెలో వేయాలి. అందులో కరిగించిన నాలుగు టేబుల్ స్పూన్ల చాకొలెట్​ని కొంచెం కొంచెంగా వేస్తూ కలపాలి. ఈ మిశ్రమాన్ని ముద్దగా చేసి దాన్నుంచి చిన్న చిన్న బాల్స్ తయారుచేయాలి. ఈ బాల్స్​ను కరిగించిన చాకొలెట్​లో ముంచాలి. తర్వాత వాటిని బటర్ పేపర్ మీద పెట్టాలి. ఆపై చాకొలెట్ సిరప్​ని డిజైన్​గా వేయొచ్చు. అవి ఆరిపోయాక చాకొలెట్ పీనట్ బాల్స్​ని తినడమే.

రాయల్ రోజ్ చాకొలెట్స్

కావాల్సినవి :

వైట్ చాకొలెట్ (కరిగించి) - 200 గ్రాములు
రోజ్ ఎసెన్స్ - రెండు చుక్కలు
మిక్స్​డ్​  డ్రైఫ్రూట్స్, సీడ్స్ పౌడర్ - కావాల్సినంత
గులాబీ రేకులు - ఒక టీస్పూన్
మిక్స్​డ్​  డ్రైఫ్రూట్స్, సీడ్స్ - కావాల్సినన్ని
ఫుడ్ కలర్ - రెండు చుక్కలు

తయారీ : వైట్ చాకొలెట్ కరిగించి ఒక గిన్నెలో వేయాలి. అందులో రోజ్ ఎసెన్స్, మిక్స్​డ్​  డ్రైఫ్రూట్స్, సీడ్స్ పౌడర్, మిక్స్​డ్​ డ్రైఫ్రూట్స్, సీడ్స్, గులాబీ రేకులు, ఫుడ్ కలర్ వేసి బాగా కలపాలి. ఆ తర్వాత చాకొలెట్ మౌల్డ్​లో గులాబీ రేకులు చల్లాలి. అందులో రెడీ చేసుకున్న మిశ్రమం వేయాలి. ఒక గంటసేపు ఫ్రిజ్​లో పెడితే రాయల్​ రోజ్​ చాకొలెట్స్​ తినడానికి రెడీ!

మిల్క్ పౌడర్ మిఠాయి

కావాల్సినవి :

మిల్క్ పౌడర్ - ఒక కప్పు
చక్కెర - అర కప్పు
పాలు - అర కప్పు
నెయ్యి - రెండు టేబుల్ స్పూన్లు
యాలకుల పొడి - అర టీస్పూన్
మిల్క్ చాకొలెట్, వైట్ చాకొలెట్ - కావాల్సినంత
యాలకుల పొడి - అర టీస్పూన్

తయారీ : ఒక గిన్నెలో నెయ్యి వేడి చేసి అందులో పాలు పోయాలి. అందులో చక్కెర కూడా వేసి బాగా కలపాలి. ఆ తర్వాత అందులో మిల్క్ పౌడర్ కలపాలి. మిశ్రమం దగ్గరపడ్డాక యాలకుల పొడి వేయాలి. ఆ తర్వాత ఏడు నిమిషాలు ఆ మిశ్రమాన్ని గరిటెతో తిప్పుతూ ఉడికించాలి. మిశ్రమం గిన్నెకు అంటుకోకుండా వచ్చేవరకు  తిప్పాలన్నమాట. ఆ మిశ్రమాన్ని ఒక ప్లేట్​లోకి  తీసుకుని కాసేపు పక్కన పెట్టి వేడి మీదనే ఉండలు చేయాలి. ఆ ఉండల్ని నెయ్యి రాసిన ప్లేట్​ మీద పేర్చాలి. ఆ తర్వాత మిల్క్ చాకొలెట్, వైట్ చాకొలెట్ విడివిడిగా కరిగించాలి. రెడీ అయిన బాల్స్​ని చాకొలెట్ మిశ్రమాల్లో ముంచాలి. కావాలంటే ఒక్కదాన్లో అయినా బాల్స్​ని ముంచొచ్చు.

బ్రెడ్ - మలాయ్ స్వీట్

కావాల్సినవి :

బ్రెడ్ ముక్కలు - ఆరు
మిల్క్ పౌడర్ - ఒక కప్పు
తాజా మలాయ్ - మూడు టేబుల్ స్పూన్లు
యాలకులు - రెండు, నెయ్యి - ఒక టీస్పూన్
చక్కెర - ఐదు టేబుల్ స్పూన్లు

తయారీ : మిక్సీజార్​లో చక్కెర, యాలకులు వేసి మిక్సీ పట్టాలి. ఆ పొడిని ఒక గిన్నెలో వేయాలి. బ్రెడ్ ముక్కలు మిక్సీజార్​లో వేసి గ్రైండ్ చేయాలి. ఈ పొడిని చక్కెర పొడిలో కలపాలి. అందులో మిల్క్ పౌడర్, మలాయ్ వేసి బాగా కలపాలి. ఈ మిశ్రమాన్ని ముద్దగా అయ్యేవరకు కలపాలి. తరువాత నెయ్యి వేసి మరోసారి కలపాలి. ఇష్టపడే వాళ్లు ఇందులో ఫుడ్ కలర్ కూడా కలపొచ్చు. ఒక ప్లేట్​కి నెయ్యి పూసి దానిపై ఈ ముద్దను పెట్టి సమంగా అదమాలి. దానిపై అక్కడక్కడ జీడిపప్పులు పెట్టి నచ్చిన షేప్​ మౌల్డ్​తో ప్రెస్ చేయాలి.