- ఈజీఎస్ ఫండ్స్తోనే పల్లె ప్రగతి పనులు
- మన ఊరు–మన బడి స్కీంకూ కేంద్రం ఫండ్సే గతి
- కొత్తగా పంచాయతీ బిల్డింగులకు ఇవే నిధులు
- నిబంధనలకు విరుద్ధంగా చేపడుతుండడంతో సమస్యలు
మహబూబ్నగర్, వెలుగు: అసలే అప్పులపాలై, ఖాళీ ఖజానాతో కొట్టుమిట్టాడుతున్న రాష్ట్ర ప్రభుత్వానికి కేంద్రం ఇస్తున్న ఉపాధి నిధులు కొండంత అండగా నిలుస్తున్నాయి. కేంద్ర ప్రభుత్వం నుంచి రాష్ట్రానికి ఏటా రూ.2వేల కోట్లకు పైగా వస్తుండడంతో ఆ ఫండ్స్తో గ్రామాల్లో అనేక అభివృద్ధి పనులు చేపడుతున్నారు. పల్లె ప్రగతిలో భాగంగా ఇప్పటికే ఊరూరా విలేజ్ పార్కులు, డంప్ యార్డులు, శ్మశాన వాటికలు, రైతువేదికలు, కల్లాలు నిర్మించిన రాష్ట్ర ప్రభుత్వం, తాజాగా ‘మన ఊరు– మన బడి’ స్కీం కింద సర్కారు స్కూళ్ల అభివృద్ధి పనులకు కూడా ఈజీఎస్ ఫండ్స్నే వాడుతోంది. కొత్తగా 3,687 జీపీలలో గ్రామపంచాయతీ బిల్డింగులకు కూడా ఉపాధి నిధులే వాడుకోవాలని నిర్ణయించింది. ఇంతవరకు బాగానే ఉన్నప్పటికీ కొన్ని పనులు ఈజీఎస్ చట్టంలోని నిబంధనలకు విరుద్ధంగా చేపడుతుండడంతో సమస్యలు వస్తున్నాయని ఆఫీసర్లు చెప్తున్నారు.
రూ.20 లక్షలు ఉపయోగించుకునేలా కేంద్రం నుంచి పర్మిషన్
కేంద్ర ప్రభుత్వం ఎనిమిదేండ్లలో రాష్ర్టానికి రూ.22,355 కోట్లఈజీఎస్ ఫండ్స్ కేటాయించింది. రెగ్యులర్గా ఫండ్స్ వస్తుండడంతో రాష్ట్ర ప్రభుత్వం కూలీలకు ఉపాధి చూపడంతోపాటు వివిధ అభివృద్ధి పనులు చేపడుతోంది. ఊరూరా సీసీ రోడ్లు, పంట పొలాల్లో కాల్వలు, చెరువులు, కాల్వలో పూడికతీత పనులతో పాటు పల్లె ప్రగతి కింద రెండేళ్లుగా నిర్మిస్తున్న విలేజ్ పార్కులు, డంప్యార్డులు, శ్మశాన వాటికలు, రైతువేదికలు, కల్లాల నిర్మాణానికి ఈజీఎస్ ఫండ్స్నే వాడుతోంది. రాష్ట్రంలో 2,601 రైతు వేదికల కోసం రూ.572.22 కోట్లు ఖర్చు చేసింది. వీటిలో రూ.260.10 కోట్లు ఈజీఎస్ నిధులే కావడం గమనార్హం, అలాగే ఒక్కో శ్మశాన వాటికకు రూ.12 లక్షలు ఖర్చు చేయగా రూ.10 లక్షలు ఈజీఎస్ నిధులే. రాష్ట్రవ్యాప్తంగా 12,660 డంపింగ్ యార్డులకూ 90శాతం నిధులను ఈజీఎస్ ఫండ్స్ నుంచే వాడుకున్నారు. ఇటీవల ‘మన ఊరు.. మనబడి’ కింద సర్కారు బడులను డెవలప్ చేయాలని నిర్ణయించిన రాష్ట్ర ప్రభుత్వం ఇందుకు సైతం ఈజీఎస్ ఫండ్స్నే వాడుకుంటోంది. మొదటి విడత రూ.3,497.62 కోట్లతో 9,123 బడుల్లో 12 రకాల ఫెసిలిటీస్ కల్పించాలని భావించినప్పటికీ సరిపడా ఫండ్స్ లేక పనులు ముందుకు సాగడం లేదు. దీంతో స్కూల్భవనాలకు రిపేర్లు, వంటగదులు, ప్రహరీ, మరుగుదొడ్ల లాంటి నిర్మాణాలన్నీ ఈజీఎస్ ఫండ్స్తోనే చేపడుతోంది. కొత్తగా 3,687 పంచాయతీల్లో జీపీ భవనాల కోసం ఒక్కో బిల్డింగ్కు రూ.20 లక్షల ఉపాధి నిధులను వినియోగించుకునేలా కేంద్రం నుంచి పర్మిషన్ తీసుకున్నది.
నిబంధనలు పాటించకపోవడం వల్లే సమస్యలు
కేంద్ర ప్రభుత్వం ఇచ్చే ఈజీఎస్ ఫండ్స్తో రైతుల పొలాలకు రోడ్ల నిర్మాణం, పంటభూముల చదును, పొలాల్లో మట్టి కట్టలు పోయడం, ఫాం పాండ్స్, పశువుల పాకలు, పశువుల తొట్లు , పౌల్ర్టీ ఫామ్స్, ఇంకుడు గంతలు, మరుగుదొడ్లు, కామన్ సోక్పిట్స్, చెరువులు, చెక్డ్యామ్లు, బావులు, కాల్వల్లో పూడికతీత లాంటి పనులు చేపట్టాలి. కానీ రాష్ట్ర సర్కారు ఈజీఎస్ నిధులను నిబంధనలకు విరుద్ధంగా రైతు వేదికలు, వైకుంఠధామాలు, డంపింగ్యార్డులు, పల్లె ప్రృతివనాలు, క్రీడా ప్రాంగణాల నిర్మాణం కోసం వాడుకున్నది. ఉపాధి కూలీలతో 60శాతం, మెటీరియల్ కాంపోనెంట్ కింద 40శాతం ఖర్చు పెట్టాల్సి ఉండగా, మెటీరియల్ కాంపోనెంట్కే ఎక్కువ కేటాయిస్తోంది. దీనివల్ల కూలీలు ఉపాధి కోల్పోతుండగా, లెక్కల్లో తేడాలను అడ్జస్ట్ చేసేందుకు అధికారులు తిప్పలు పడ్తున్నారు. రాష్ర్ట సర్కారు ఎనిమిది రకాల పనులను ఈజీఎస్ చట్టంలోని నిబంధనలకు విరుద్ధంగా చేపట్టిందని జూన్, జూలై నెలల్లో రాష్ర్టంలో పర్యటించిన కేంద్ర తనిఖీ బృందాలు తేల్చాయి. ఈ క్రమంలోనే కల్లాల నిర్మాణానికి వాడుకున్న రూ.150 కోట్లు వాపస్ ఇవ్వాలని కేంద్రం నోటీసులిచ్చిందని గ్రామీణాభివృద్ధి శాఖ అధికారులు చెప్తున్నారు.
