లోక్సభ ఎలక్షన్లు మరో ఎనిమిది రోజుల్లో పూర్తవుతాయి. మొత్తం ఏడు దశల పోలింగ్ చివరి దశకు వచ్చేసింది. ఈ నేపథ్యంలో ఏప్రిల్‌ 11 న జరిగిన మొదటి విడత పోలింగ్ నుంచి ఈ నెల 23న వెలువడే ఫలితాలకు నడుమ దాదాపు 40 రోజుల వ్యవధి రావడంతో దేశమంతా ఊహాగానాలు సాగుతున్నాయి. ఫలానా కూటమిదే విక్టరీ అంటూ బెట్టింగ్లు కడుతున్నారు. ఈ బెట్టింగ్ విలువ రూ.23 వేల కోట్ల వరకు చేరింది.
దేశంలోని మొత్తం 543 లోక్సభ సెగ్మెంట్లలో మరో 118 స్థానాల్లో మాత్రమే ఓటింగ్ జరగాల్సి ఉంది. అభ్యర్థుల జాతకాలు ఈ నెల 23న వెల్లడి కానున్నాయి. కేంద్రంలో కొత్త ప్రభుత్వాన్ని ఏర్పాటు చేయబోయేది ఎవరన్నదీ మరో 13 రోజుల్లో తెలిసిపోతుంది. ఫలితాలపై ప్రజల్లో రోజురోజుకీ ఆసక్తి పెరుగుతోంది.
ఈ ఇంట్రస్ట్ కాస్తా వేల కోట్ల రూపాయల్లో పందాలు కాసే లెవెల్కి చేరింది. జనరల్ ఎలక్షన్ సందర్భంగా గల్లీ నుంచి ఢిల్లీ వరకు వివిధ అంశాలపై లీడర్ల ప్రచారం ఆకాశమే హద్దుగా జరిగింది. ఇప్పుడు వాళ్ల పార్టీలు, కూటములు తరఫున బెట్టింగ్లు కూడా అదే రేంజ్లో సాగుతున్నాయి. అయితే ఈ పందెం రాయుళ్లు ఏ అలయెన్స్కి స్పష్టమైన మెజారిటీ వస్తుందో క్లియర్గా చెప్పలేకపోతున్నారు. ప్రతిపక్ష కూటముల (యూపీఏ, మహాకూటమిల) మధ్య కూడా పోటీ తీవ్రంగా నెలకొందని అంటున్నారు.
మళ్లీ తప్పని పొత్తులు!
ఎన్డీఏ, యూపీఏ మాదిరిగా మహా కూటమికి కూడా పెద్ద సంఖ్యలో సీట్లు వస్తాయని, దీనివల్ల ప్రభుత్వ ఏర్పాటు కోసం ఈ అలయెన్స్ల మధ్య ఎంపీల బేరసారాలు తప్పకపోవచ్చని అంచనా వేస్తున్నారు. ఇప్పటిదాకా ఎన్నికల కోసం పొత్తులు పెట్టుకొన్న పార్టీలు ఇకపై కొయిలేషన్ దిశగా చర్చలకు దిగుతాయని చెబుతున్నారు. లోక్సభలో హంగ్ ఏర్పడే చాన్స్లూ లేకపోలేదని సూచిస్తున్నారు. బీజేపీ నాయకత్వంలోని ఎన్డీఏ మళ్లీ అధికారం చేపట్టేలా ‘మేనేజ్’ చేయగలదని బెట్టింగ్ మార్కెట్ వర్గాలు గట్టి నమ్మకంతో ఉన్నాయి.
ఈ కూటమి 185 నుంచి 220 వరకు సీట్లు గెలవనుండగా, యూపీఏ 160 నుంచి 180 స్థానాలతోనే సరిపెట్టుకోవాల్సి వస్తుందని స్పెక్యులేటర్లు చెప్పారు. ఇదిలా ఉంటే, పందాల్లో భాగంగా ఎన్డీఏ రేటు ఒకటికి రెండు రూపాయలు పలుకుతుండగా యూపీఏ రేటు రూపాయిన్నర వద్దే ఆగిపోయిందని అంటున్నారు. మరో వైపు దీనికి భిన్నమైన వాదనలు వినిపిస్తున్నాయి. సర్జికల్ స్ట్రయిక్స్‌ ఈ ఎన్నికల్లో కమలనాథులకు ఆశించిన ఫలితాలను ఇవ్వలేకపోవచ్చనే డౌట్‌ వ్యక్తమవుతోంది.
గ్రాండ్ అలయెన్స్ చెప్పుకోదగ్గ స్థాయిలో సీట్లు సాధించి కింగ్ మేకర్లా ఎదగనుందని సూరత్, ముంబై, కోల్కతా, ఢిల్లీల్లోని విశ్లేషకులు అంటున్నారు. ప్రధాన ప్రతిపక్ష పార్టీలను సైతం మహా కూటమి వెనక్కి నెట్టగలదని తేల్చిచెబుతున్నారు. ప్రధాని మోడీ, బీజేపీ చీఫ్ అమిత్ షాలకు వాళ్ల సొంత రాష్ట్రం గుజరాత్లో ఎదురు దెబ్బ తగలనుందని అంచనా వేస్తున్నారు. ‘అభివృద్ధి విషయంలో దేశానికి మోడల్’ అంటూ తెగ ప్రచారం చేసిన ఆ స్టేటు నుంచి కమలదళం బ్యాడ్ న్యూస్ వినాల్సి వస్తుందని టాక్.
గుజరాత్లో పోయినసారి మొత్తం 26 లోక్సభ సీట్లను గెలుచుకున్న బీజేపీ ఈసారి ఆరు వరకు కోల్పోవాల్సి వస్తుందని బుక్కీలు లెక్కలేస్తున్నారు. సూరత్, ముంబై, ఢిల్లీల్లోని బెట్టింగ్ మార్కెట్లు మాత్రం దీన్ని అస్సలు ఒప్పుకోవట్లేదు. అధికార పార్టీ గుజరాత్లో 22 స్థానాల్లో విజయం సాధిస్తుందని, గ్రాండ్ ఓల్డ్ కాంగ్రెస్ పార్టీ కేవలం నాలుగు చోట్లే నెగ్గగలదని అంటున్నాయి. ఆ రాష్ట్రంలో కమలనాథులు పోటీకి నిలబెట్టిన క్యాండిడేట్లలో 19 మంది విన్నర్లుగా నిలుస్తారని, హస్తం పార్టీ వాళ్లు ఏడుగురు విజేతలవుతారని సూరత్, ముంబైల్లోని సట్టా బజార్ వర్గాలు బలంగా చెబుతున్నాయి.
బీజేపీ సౌరాష్ట్ర రీజియన్లో రెండు నుంచి మూడు; నార్త్, సౌత్ గుజరాత్ల్లో ఒకటి చొప్పున ఎంపీ సీట్లు కోల్పోతుందని బెట్టింగ్ బంగార్రాజులు లెక్కలేస్తున్నారు. సౌరాష్ట్ర ప్రాంతంలో కాంగ్రెస్ అమ్రేలీ, సురేంద్ర నగర్, జునాగఢ్ స్థానాలను ఖాతాలో వేసుకోనుంది. నార్త్లో బనస్కాంత, పటాన్ సెగ్మెంట్లను; సౌత్లో వలసాడ్ నియోజకవర్గాన్ని హస్తం పార్టీ కైవసం చేసుకోనుందని స్పెక్యులేటర్ల డేటా చెబుతోంది. ఎన్నికల్లో గెలిచేవాళ్లను బట్టే ఈ బెట్టింగుల్లో విజేతలు డిసైడ్ అవుతారు. అప్పటివరకు పబ్లిక్కి, పంటర్లకు ఈ సస్పెన్స్ తప్పదు.
