- ప్రయాణికుల రద్దీకి తగ్గట్టుగా ప్రవేశపెడుతున్న ఆర్టీసీ
- తాజాగా 24 మెట్రో డీలక్స్బస్సులు అందుబాటులోకి..
- నెల రోజుల్లో మరో 101 బస్సులు ప్రారంభిస్తామంటున్న ఆఫీసర్లు
హైదరాబాద్, వెలుగు : గ్రేటర్సిటీ పరిధిలోని ప్రయాణికుల రద్దీకి అనుగుణంగా ఆర్టీసీ బస్సులను ప్రవేశపెడుతోంది. దశల వారీగా కొత్త బస్సులను తీసుకొస్తోంది. సోమవారం 21 మెట్రో డీలక్స్బస్సులను అందుబాటులోకి తెచ్చినట్లు గ్రేటర్హైదరాబాద్ జోన్ డిప్యూటీ ఎగ్జిక్యూటివ్ డైరెక్టర్ శ్రీనివాస్వెల్లడించారు. సిటీ వ్యాప్తంగా ప్రస్తుతం 2,850 బస్సులు నడుస్తున్నాయని, పెరిగిన డిమాండ్ కు అనుగుణంగా కొత్త బస్సులను అందుబాటులోకి తీసుకొస్తున్నామని తెలిపారు.
ఈ నెల 3న మూడు మెట్రో డీలక్స్బస్సులను ప్రారంభించామని, తాజాగా 21 డీలక్స్ బస్సులను ఆయా రూట్లలో ప్రవేశపెట్టామని స్పష్టం చేశారు. నెల రోజుల్లో మరో 101 బస్సులు అందుబాటులోకి తీసుకొస్తామని చెప్పారు.
కీలక రూట్లలో..
‘మహాలక్ష్మి స్కీమ్’ అమలులోకి వచ్చాక గ్రేటర్పరిధిలో ఆర్టీసీ ప్రయాణికుల సంఖ్య గణనీయంగా పెరిగింది. ఏ రూట్లో చూసినా బస్సులు కిక్కిరిసి కనిపిస్తున్నాయి. ఈ నేపథ్యంలో ఆర్టీసీ అధికారులు కొత్తగా మెట్రో డీలక్స్బస్సులను తీసుకొస్తున్నారు. ఈ బస్సుల్లో మహాలక్ష్మి పథకం వర్తించదని అధికారులు స్పష్టం చేశారు. ముఖ్యంగా ఐటీకారిడార్, హైటెక్సిటీ, కొండాపూర్, లింగంపల్లి, మెహిదీపట్నం, ఈసీఐఎల్రూట్లలో కొత్త బస్సులు అందుబాటులో ఉండనున్నాయి. తాజాగా ప్రవేశపెట్టిన 24 బస్సుల్లో
సికింద్రాబాద్– ఈసీఐఎల్రూట్లో 4, ఉప్పల్– మెహిదీపట్నం రూట్లో 7, సికింద్రాబాద్– జగద్గిరిగుట్ట రూట్లో 2, సికింద్రాబాద్–మెహిదీపట్నం 2, ఈసీఐఎల్ – కోఠి 2, సికింద్రాబాద్– ఎల్బీనగర్2, కాచిగూడ రైల్వేస్టేషన్– గండిమైసమ్మ 1, జేబీఎస్ – అబ్దుల్లాపూర్మెట్2, సికింద్రాబాద్– హయత్నగర్ రూట్లో 2 బస్సులను ప్రవేశ పెట్టినట్లు అధికారులు తెలిపారు. త్వరలో ఎంపిక చేసిన రూట్లలో మరిన్ని మెట్రో డీలక్స్బస్సులను ప్రారంభిస్తామని అధికారులు వెల్లడించారు.
