ఐకాన్ స్టార్ అల్లు అర్జున్ హీరోగా నటిస్తున్న పుష్ప 2: ది రూల్ సినిమా కోసం బన్నీ ఫ్యాన్స్, ఆడియన్స్ చాలా ఆసక్తిగా ఎదురు చూస్తున్నారు. పుష్ప ఫస్ట్ పార్ట్ బిగ్ హిట్ అవ్వడంతో సెకెండ్ పార్ట్ పై భారీ అంచనాలు నెలకొన్నాయి. అయితే పుష్ప 2 ప్రపంచ వ్యాప్తంగా డిసెంబర్ 5న గ్రాండ్ గా రిలీజ్ అవుతున్న విషయం తెలిసిందే. ఈ సినిమా ట్రైలర్ ఈరోజు (నవంబర్ 17) సాయంత్రం రిలీజ్ చేస్తున్నట్లు చిత్ర యూనిట్ ప్రకటించారు. దీంతో బీహార్ లోని పాట్నా సిటీలో ఉన్నటువంటి గాంధీ మైదానంలో పెద్ద ఎత్తున ఈవెంట్ నిర్వహించి సాయంత్రం 6:03 గంటలకి రిలీజ్ చేయనున్నారు.
పుష్ప 2 ట్రైలర్ లాంచ్ ఈవెంట్ కి దాదాపుగా 25000 మంది అభిమానులు హాజరవుతున్నట్లు సమాచారం. దీంతో చిత్ర యూనిట్ భద్రతా సిబ్బందితో కలసి భారీ ఏర్పాట్లు చేస్తున్నారు. అలాగే ఎలాంటి అవాంఛనీయ సంఘటనలు జరగకుండా పోలీసులు చర్యలు తీసుకుంటున్నారు. ఇక తెలుగు రాష్ట్రాలనుంచి బన్నీ ఫ్యాన్స్ ఇప్పటికే చాలామంది బీహార్ లోని పాట్నా సిటీకి చేరుకున్నారు. దీంతో గాంధీ మైదానం దగ్గరలోని హోటల్స్, లాడ్జీలు వంటివి ఫుల్ అయినట్లు తెలుస్తోంది.
ఈ విషయం ఇలా ఉండగా పుష్ప 2 ట్రైలర్ లాంచ్ ఈవెంట్ లో భోజ్పూరి నటి అక్షర సింగ్ స్పెషల్ పెర్ఫార్మెన్స్ ఇవ్వనుంది. ఈ విషయాన్ని చిత్ర యూనిట్ సోషల్ మీడియా వేదికగా తెలిపింది. అయితే నటి అక్షర సింగ్ పలు టీవి సీరియల్స్, సినిమాలలో నటించి మంచి గుర్తింపు తెచ్చుకుంది. ఈ కారణంగానే పుష్ప 2 ట్రైలర్ లాంచ్ ఈవెంట్ లో స్పెషల్ పెర్ఫార్మెన్స్ చేసే అవకాశం ఇచ్చినట్లు సమాచారం.
