- అబూజ్మఢ్ దండకారణ్యంలో తుపాకుల మోత
- డీఆర్జీ, ఎస్టీఎఫ్, సీఆర్పీఎఫ్, బస్తర్ ఫైటర్స్ కూంబింగ్
- మావోయిస్టులు ఎదురుపడడంతో ఇరువర్గాల మధ్య భీకర కాల్పులు
- మృతదేహాలతో పాటు ఆయుధాలు, పేలుడు పదార్థాలు స్వాధీనం
- మృతుల్లో అగ్రనేతలు నీతి, కమలేశ్.. వీరిద్దరిపై 8 లక్షల రివార్డు
- ఆటోమేటిక్ వెపన్స్ దొరకడంతో అగ్రనేతలున్నట్టు అనుమానం
- అదనపు బలగాల తరలింపు.. కొనసాగుతున్న గాలింపు
భద్రాచలం, వెలుగు : చత్తీస్గఢ్ దండకారణ్యంలో మరోసారి తుపాకుల మోత మోగింది.అబూజ్మఢ్ ఏరియాలో జరిగిన భారీ ఎన్కౌంటర్లో మావోయిస్టులకు కోలుకోలేని దెబ్బ తగిలింది. నారాయణ్పూర్–-దంతెవాడ జిల్లాల బార్డర్లోని నెందూర్, గోవెల్, తుల్తులీ గ్రామాల అటవీ ప్రాంతంలో శుక్రవారం భద్రతా బలగాలకు, మావోయిస్టులకు మధ్య జరిగిన భీకర కాల్పుల్లో 36 మంది మావోయిస్టులు మృతిచెందారు. వీరిలో మావోయిస్టు పార్టీ అగ్రనేతలు నీతి, కమలేశ్ ఉన్నారని పోలీసులు చెబుతున్నారు.
వీరిద్దరిపై రూ.8లక్షల చొప్పున రివార్డులు ఉన్నాయి. దండకారణ్యంలో ఈ ఏడాదిలోనే ఇది అతిపెద్ద ఎన్కౌంటర్గా పోలీసులు పేర్కొన్నారు. మావోయిస్టుల మృతదేహాలతోపాటు ఏకే47, ఎస్ఎల్ఆర్, ఆటోమెటిక్ వెపన్స్ స్వాధీనం చేసుకున్నట్టు బస్తర్ ఐజీ సుందర్రాజ్ పీ, నారాయణ్పూర్, దంతెవాడ ఎస్పీలు ప్రభాత్కుమార్, గౌరవ్ రాయ్ వెల్లడించారు.
ఉనికి కోసం వచ్చి..చావు దెబ్బతిని
చత్తీస్గఢ్లో మావోయిస్టులు ఇటీవల గడ్డు పరిస్థితులను ఎదుర్కొంటున్నారు. గడిచిన 8 నెలల్లో 185 మందిని భద్రతా బలగాలు మట్టుబెట్టాయి. మావోయిస్టు పార్టీ ఆవిర్భావ దినోత్సవాలు జరుపుకుంటున్న వేళ తమ ఉనికిని చాటుకునేందుకు మావోయిస్టులు వచ్చి చావు దెబ్బతిన్నారు. అబూజ్మఢ్లో ఇప్పటి వరకు ఎవరూ అడుగుపెట్టలేదు. కానీ ఇప్పుడు అక్కడ కొత్తగా మాన్పూర్, కసర్మెట్ట, మొహందీ, ఇర్రక్బట్టి గ్రామాల్లో సీఆర్పీఎఫ్ బేస్ క్యాంపులను ఏర్పాటు చేశారు. సేఫ్జోన్ను భద్రతా బలగాలు దాదాపు చుట్టుముట్టాయి.
మావోయిస్టు అగ్రనేతలు ఉండే ఈ ప్రాంతంలో తాజాగా ఆర్మీ బేస్ క్యాంపు కోసం కేంద్రం 5 వేల హెక్టార్ల భూమిని సేకరిస్తున్నది. 2026 నాటికి దేశంలో వామపక్ష తీవ్రవాదాన్ని నిర్మూలిస్తామని ఇటీవలే కేంద్ర హోం శాఖ మంత్రి అమిత్షా తన చత్తీస్గఢ్ పర్యటనలో ప్రకటించారు. లొంగిపోవాలని మావోయిస్టులకు పిలుపునిచ్చారు. ఇలాంటి తీవ్ర ఒత్తిళ్ల మధ్య భద్రతా బలగాలపై పైచేయి సాధించాలనే లక్ష్యంతో ఓర్చా, బార్సూర్ ప్రాంతాల్లో మావోయిస్టులు భారీగా సమావేశం అయినట్టుగా బస్తర్ పోలీసులకు పక్కా సమాచారం అందింది.
దీంతో దంతెవాడ, నారాయణ్పూర్ జిల్లాల నుంచి డీఆర్జీ, ఎస్టీఎఫ్,సీఆర్పీఎఫ్, కోబ్రా, బస్తర్ ఫైటర్లను రంగంలోకి దించారు. నెందూర్, గోవెల్, తుల్తులీ గ్రామాల అటవీ ప్రాంతాన్ని చుట్టుముట్టారు. మావోయిస్టులు ఆ ప్రాంతంలో అప్పటికే మిలీషియా, పీఎల్జీఏ సభ్యులతో దాడులకు సిద్ధంగా ఉన్నారు. భద్రతా బలగాలను చూసి కాల్పులు ప్రారంభించారు. అప్రమత్తమైన భద్రతా బలగాలు సైతం ఎదురుదాడికి దిగాయి. దీంతో మధ్యాహ్నం ఒంటి గంట నుంచి సాయంత్రం 6 గంటల వరకు ఇరువర్గాల మధ్య హోరాహోరీగా కాల్పులు జరగ్గా..
36 మంది మావోయిస్టులు మృతిచెందారు. జవాన్లు అందరూ సురక్షితంగా ఉన్నారు. అయితే, ఎన్కౌంటర్ జరిగిన ప్రదేశంలో ఏకే -47, ఎస్ఎల్ఆర్,ఆటోమెటిక్ వెపన్స్ దొరకడంతో భారీ వ్యూహంతోనే అగ్రనేతలు దాడికి దిగినట్టుగా పోలీసులు అనుమానిస్తున్నారు. పారిపోయిన వారి కోసం అడిషనల్టీంలను కూంబింగ్కు పంపించారు. కూంబింగ్ ఇంకా కొనసాగుతూనే ఉందని బస్తర్ ఐజీ సుందర్రాజ్ పీ తెలిపారు.
కిష్టారం ఏరియా కమిటీ డంప్ స్వాధీనం
చత్తీస్గఢ్ రాష్ట్రం సుక్మా జిల్లా చింతగుప్ప పోలీస్స్టేషన్ పరిధిలోని బొంతలంక- ఎర్నపల్లి అడవుల్లో గురువారం రాత్రి జరిగిన ఎన్కౌంటర్లో కిష్టారం ఏరియా కమిటీ పీఎల్జీఏ 1 బెటాలియన్కు చెందిన మావోయిస్టుల డంప్ను భద్రతా బలగాలు స్వాధీనం చేసుకున్నాయి. చింతవాగు ఒడ్డున మావోయిస్టుల సమావేశంపై భద్రతా బలగాలు గురిపెట్టాయి. ఈ క్రమంలో మావోయిస్టులు కాల్పులు జరుపుకుంటూ అడవుల్లోకి పారిపోయారు. 12 బోర్ తుపాకులు, వైర్లెస్ సెట్లు, సోలార్ ప్లేట్లు, కెమెరా ఫ్లాష్లు, డిటోనేటర్లు, మందులు, నిత్యావసర సరుకులు, విప్లవసాహిత్యం స్వాధీనం చేసుకున్నారు.
తుది దశకు నక్సలిజం : చత్తీస్గఢ్ సీఎం విష్ణుదేవ్ సాయ్
చత్తీస్ గఢ్లో నక్సలిజం తుదిదశకు చేరుకుందని ఆ రాష్ట్ర సీఎం విష్ణుదేవ్ సాయ్ అన్నారు. ‘‘అబూజ్మఢ్లో జరిగిన ఎన్కౌంటర్లో 36 మంది మావోయిస్టులు చనిపోయినట్టు వార్తలు వస్తున్నాయి. మన భద్రతా బలగాలు సాధించిన గొప్ప విజయం ఇది. వారందరికీ అభినందనలు. 9 నెలల్లో కేంద్ర హోం శాఖ మంత్రి అమిత్షా ఇక్కడ 2 సార్లు పర్యటించారు. 2026 నాటికి నక్సలిజాన్ని పూర్తిగా నిర్మూలించడం కేంద్ర సంకల్పం అని చెప్పారు. రాష్ట్రం నుంచి నక్సలిజాన్ని పూర్తిగా నిర్మూలించడమే మా లక్ష్యం” అని ట్వీట్ చేశారు.
