- పట్టాదార్ పాస్ పుస్తకం కోసం 46 ఏళ్ల నిరీక్షణ...
- 100 రోజుల్లో ప్రజావాణిలో పరిష్కారం
పంజాగుట్ట, వెలుగు: బేగంపేటలోని మహాత్మా జ్యోతిరావ్ ఫూలే ప్రజాభవన్లో మంగళవారం నిర్వహించిన ప్రజావాణికి మొత్తం 1031 దరఖాస్తులు వచ్చినట్టు అధికారులు తెలిపారు. వాటిలో మైనారిటీ వెల్ఫేర్కు 580,పంచాయతీ రాజ్ గ్రామీణ అభివృద్ధికి 172,విద్యుత్ వాఖకు చెందినవి 81, ప్రవాసీ ప్రజావాణికి 02, ఇతర శాఖలకు 196 దరఖాస్తులు అందాయి. ప్రణాళికా సంఘం ఉపాధ్యక్షుడు డాక్టర్ చిన్నారెడ్డి పర్య వేక్షణలో నోడల్ అధికారి దివ్య దేవరాజన్ ప్రజల నుంచి ఫిర్యాదులను స్వీకరించారు.
పట్టాదార్ పాస్ బుక్ కోసం 46 ఏళ్ల నిరీక్షణ ...
పట్టాదార్ పాస్ పుస్తకం కోసం 46 ఏళ్లుగా రెవెన్యూ అధికారుల చుట్టూ తిరుగుతున్నా పరిష్కారం కాలేదని .. ప్రజావాణిలో దరఖాస్తు చేసుకుంటే 100 రోజుల్లోనే పాస్ బుక్ వచ్చిందని కొమ్మన బోయిన పిచ్చయ్య ఆనందం వ్యక్తం చేశాడు. నల్గొండ జిల్లా నకిరేకల్ నియోజక వర్గం కట్టంగూర్ మండలం ఎర్రసాని గూడెం గ్రామానికి చెందిన కొమ్మన బోయిన పిచ్చయ్యకు సర్వే నంబరు 215/3 ఒక ఎకరం భూమి ఉంది.
1978 నుంచి దానికి పాస్ బుక్కోసం రెవెన్యూ అధికారుల చుట్టూ తిరిగాడు.అయినా ఫలితం దక్కలేదు. ప్రజావాణిలో పాస్బుక్ కోసం జూలైలో దరఖాస్తు చేసుకున్నాడు. మంగళవారం జరిగిన ప్రజావాణి కార్యక్రమంలో పిచ్చయ్యకు డాక్టర్ చిన్నారెడ్డి, నోడల్ అధికారి దివ్య దేవరాజన్ పాస్ బుక్ను అందజేశారు. ముఖ్య మంత్రి రేవంత్ రెడ్డికి పిచ్చయ్య తనకుమారులు నరసింహా , స్వామి యాదవ్ కృతజ్ఞతలు తెలిపారు.
