- ప్రైవేట్ఎంప్లాయ్ని భయపెట్టి
- రూ. 5 లక్షలు కొట్టేసిన సైబర్ నేరగాళ్లు
బషీర్ బాగ్, వెలుగు : బ్యాంక్ స్కామ్ లో ఉన్నావని..హైదరాబాద్కు చెందిన ప్రైవేట్ ఎంప్లాయ్ ని భయపెట్టి సైబర్ నేరగాళ్లు రూ. 5 లక్షలు కొట్టేశారు. హైదరాబాద్ సైబర్ క్రైమ్ ఏసీపీ శివమారుతి కథనం ప్రకారం.. కొద్దిరోజుల కింద ఓ ప్రైవేట్ ఎంప్లాయ్ (28)కి ఎస్బీఐ క్రెడిట్ కార్డు వింగ్ నుంచి మాట్లాడుతున్నామని కాల్ చేశారు. క్రెడిట్ కార్డు పెండింగ్ చార్జీలు రూ. 95 వేలు చెల్లించాలన్నారు. తనకు క్రెడిట్ కార్డు లేదని చెప్పగా, ఓ సంస్థకు కంప్లయింట్ చేయాలని ఓ కాంటాక్ట్ నంబర్ ఇచ్చి వీడియో కాల్ చేయమని సూచించాడు.
ఆ నంబర్కు వీడియో కాల్ చేయగా.. పోలీస్ యూనిఫామ్ వేసుకున్న ఓ వ్యక్తి తన ఐడీ కార్డు చూపించాడు. ‘కెనరా బ్యాంక్లో రెండున్నర కోట్ల స్కామ్ జరిగింది. అందులో నీ పాత్ర ఉంది. నీ బ్యాంక్ అకౌంట్స్ , ప్రాపర్టీస్ సీజ్ చేసి నిన్ను అరెస్టు చేస్తాం’ అని బాధితుడిని భయపెట్టాడు. కేసు నుంచి బయటపడాలంటే తాము అడిగినన్ని డబ్బులు తాము చెప్పిన అకౌంట్కు ట్రాన్స్ ఫర్ చేయాలని కోరాడు. ఆర్బీఐ గైడ్ టైన్స్ మేరకు వెరిఫై చేసి తిరిగి పంపిస్తామని అతడిని నమ్మించాడు.
దీంతో బాధితుడు తన అకౌంట్లోని రూ. 5 లక్షలు వెంటనే వారు చెప్పిన అకౌంట్ నంబర్కు ట్రాన్స్ఫర్ చేశాడు. వెంటనే వీడియో కాల్ కట్ కాగా, తర్వాత ఎలాంటి రిప్లై రాలేదు. దీంతో బాధితుడు మోసపోయినట్లు తెలుసుకు సైబర్ క్రైమ్ పోలీసులకు కంప్లయింట్ చేశాడు. కేసు దర్యాప్తు చేస్తున్నట్లు ఏసీపీ తెలిపారు.
