- అవన్నీ కేసీఆర్కు అత్యంత క్లోజ్గా ఉండేవాళ్లవే
- కాళేశ్వరంపై జస్టిస్ ఘోష్ కమిషన్ విచారణలో వెల్లడి?
- కాంట్రాక్ట్ సంస్థల ఆర్థిక లావాదేవీలపై కమిషన్ ఆరా
- ప్రతి పైసా లెక్క తీసేందుకు త్వరలో చార్టర్డ్ అకౌంటెంట్ నియామకం
- అందుకు రాష్ట్ర ప్రభుత్వానికి లేఖ రాయాలని నిర్ణయం
- క్రాస్ ఎగ్జామినేషన్కు వేరే రాష్ట్రం నుంచి అడ్వకేట్!
- 16న కమిషన్ ముందు వెదిరె శ్రీరాం పవర్ పాయింట్ ప్రెజెంటేషన్
- 15న తన వాదనలు వినిపించనున్న విద్యుత్ అధికారి కంచర్ల రఘు
హైదరాబాద్, వెలుగు: కాళేశ్వరం ప్రాజెక్టులో ఆర్థిక అవకతవకలపై జస్టిస్ పీసీ ఘోష్ నేతృత్వంలోని జ్యుడీషియల్ కమిషన్ ఎంక్వైరీని ముమ్మరం చేసింది. టెక్నికల్ అంశాలతో పాటు ఆర్థిక అక్రమాలపై సమాంతరంగా విచారణను చేపడ్తున్నది. ఇందులో భాగంగా కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీల్లో భారీ అవకతవకలు జరిగినట్టు.. ఆ మూడు బ్యారేజీల నిర్మాణంలో 50కిపైగా సబ్ కాంట్రాక్ట్ సంస్థలు భాగమైనట్లు కమిషన్ దృష్టికి వచ్చినట్లు తెలిసింది.
బీఆర్ఎస్ చీఫ్, మాజీ సీఎం కేసీఆర్కు అత్యంత క్లోజ్గా ఉండే వ్యక్తుల సంస్థలకే సబ్ కాంట్రాక్ట్లు వెళ్లినట్టు సమాచారం. ఆయా సంస్థల ఆర్థిక లావాదేవీలపై కమిషన్ స్పెషల్ ఫోకస్ పెట్టింది. వాటితో పాటు ప్రధాన కాంట్రాక్ట్ సంస్థల నుంచి ఎవరెవరికి నిధులు మళ్లాయనేదానిపైనా లోతుగా విచారణ జరిపేందుకు సిద్ధమైంది. ప్రధాన, సబ్ కాంట్రాక్ట్ సంస్థల ఆర్థిక లావాదేవీలపై క్షుణ్ణంగా పరిశీలించేందుకు ఓ చార్టర్డ్ అకౌంటెంట్(సీఏ)ను నియమించుకోవాలని కమిషన్ యోచిస్తున్నట్టు తెలిసింది.
ఎంతమేర ఆర్థిక అవకతవకలు జరిగాయన్న విషయంలో ప్రతి పైసాకూ లెక్కలను తీయాలన్న ఆలోచనలో కమిషన్ ఉన్నట్లు సమాచారం. అందులో భాగంగానే చార్టర్డ్ అకౌంటెంట్ను నియమించేలా రాష్ట్ర సర్కారుకు త్వరలోనే లేఖ రాయాలని కమిషన్ చైర్మన్ జస్టిస్ పినాకి చంద్రఘోష్ యోచిస్తున్నట్టు తెలిసింది. అంతేగాకుండా కాగ్ రిపోర్ట్లోని ఆర్థికాంశాలపైనా ఆ సీఏతో పూర్తి విశ్లేషణ చేయించాలని జస్టిస్ ఘోష్ భావిస్తున్నట్టు సమాచారం.
క్రాస్ ఎగ్జామినేషన్కు బయటి లాయర్
విచారణలో భాగంగా అధికారులు, అఫిడవిట్లు సమర్పించిన వారిని క్రాస్ ఎగ్జామినేషన్ చేయాలనుకుంటున్న జ్యుడీషియల్ కమిషన్.. అందుకు ఓ లాయర్ను కూడా నియమించుకోవాలని భావిస్తున్నది. ఇక్కడి వారిని కాకుండా.. ఈ ఏరియాతో సంబంధం లేని వేరే రాష్ట్రాల అడ్వకేట్ను క్రాస్ఎగ్జామినేషన్కు నియమించాలని యోచిస్తున్నది.
ఇందుకోసం ఢిల్లీ లేదా ముంబైకి చెందిన అడ్వకేట్ల వివరాలను ఆరా తీస్తున్నట్టు, అందులో బెస్ట్ అడ్వకేట్ను ఎంపిక చేసే అవకాశం ఉన్నట్లు తెలిసింది. కాళేశ్వరంలోని ఆర్థికపరమైన అవకతవకల్లో ప్రతి విషయాన్నీ వెలికి తీయాలని కమిషన్ తీవ్రంగా ప్రయత్నిస్తున్నట్లు సమాచారం. అందుకు తగ్గట్టు దొరికిన ఏ ఒక్క సాక్ష్యాధారాన్నీ వదిలిపెట్టడంలేదు. కొందరు ప్రైవేటు వ్యక్తుల నుంచి కూడా దీనిపై ఆధారాలను సేకరిస్తున్నట్టు తెలిసింది.
ఆగస్టు చివరి నాటికి రిపోర్ట్?
కాళేశ్వరంపై ఆగస్టు చివరి నాటికి విచారణను పూర్తి చేయాలని కమిషన్ చైర్మన్ జస్టిస్ ఘోష్ భావిస్తున్నట్లు సమాచారం. ఇందులో భాగంగానే విచారణను వేగవంతం చేశారు. ఈ నెల 16న ఆయన కోల్కతాకు వెళ్లి మళ్లీ ఈ నెల చివరి వారంలో రాష్ట్రానికి వచ్చే అవకాశాలున్నాయి. అక్కడి నుంచి విచారణను మరింత స్పీడప్ చేయనున్నారు.
ఆగస్టులో దాదాపు మూడు వారాల పాటు దీనిపై దృష్టి కేంద్రీకరించి.. రిపోర్టును సిద్ధం చేసే చాన్స్ ఉంది. వీలైనంత వరకు ఆగస్టు చివరి నాటికి రిపోర్ట్ ఇవ్వొచ్చని, ఒకవేళ అది సాధ్యం కాకపోతే మరికొంత గడువునూ కోరే అవకాశం ఉందని ఇరిగేషన్ వర్గాలు అంటున్నాయి.
కమిషన్ ముందు విచారణకు ఏజెన్సీల ప్రతినిధులు
పంప్హౌస్ ఏజెన్సీల ప్రతినిధులు ముగ్గురు గురువారం జ్యుడీషియల్ కమిషన్ ఎదుట విచారణకు హాజరయ్యారు. ఇప్పటికే ఓ సంస్థకు చెందిన వైస్చైర్మన్ కూడా విచారణకు హాజరైనట్టు తెలిసింది. ఆయనతో పాటు సంస్థల ప్రతినిధులు గురువారం విచారణకు వచ్చినట్టు సమాచారం. బ్యారేజీలు, పంప్హౌస్ల నిర్మాణానికి సంబంధించిన పూర్తి టెక్నికల్ అంశాలను కమిషన్ ఆరా తీస్తున్నది.
బ్యారేజీలు కుంగడానికి కారణమేంటి? పంప్హౌస్ల నుంచి నీటిని ఎత్తిపోసేందుకు ఎంత కరెంట్ఖర్చవుతుంది? పంప్హౌస్ల మోటార్ల సామర్థ్యం ఎంత? వంటి వివరాలను సంస్థల ప్రతినిధుల నుంచి రాబట్టినట్లు సమాచారం. వారితో పాటు ఇరిగేషన్ శాఖ వర్క్స్ అండ్ అకౌంట్స్ డైరెక్టర్ కూడా విచారణకు హాజరయ్యారు. వివిధ సంస్థలకు కాంట్రాక్ట్ కేటాయించిన విధానాలు.. పనులు జరిగిన తీరు.. విధానపరమైన నిర్ణయాల గురించి జస్టిస్ ఘోష్ విచారణలో ఆరా తీసినట్లు తెలిసింది.
16న కమిషన్ ముందుకు వెదిరె శ్రీరాం!
కేంద్ర జలశక్తి శాఖ సలహాదారు వెదిరె శ్రీరాం ఈ నెల 16న జస్టిస్ పీసీ ఘోష్ కమిషన్ ముందు విచారణకు హాజరు కానున్నారు. వాస్తవానికి శుక్రవారం లేదా సోమవారం ఆయన విచారణకు వస్తారని ముందు చెప్పినా.. కొన్ని కారణాల వల్ల ఆ రోజుల్లో ఆయన విచారణకు రాలేనని చెప్పినట్టు తెలిసింది. దీంతో మంగళవారం (ఈ నెల 16న) ఉదయం కమిషన్ ముందుకు ఆయన వస్తారని సమాచారం.
కాళేశ్వరం ప్రాజెక్టుకు సంబంధించిన సమస్త సమాచారాన్ని పవర్ పాయింట్ ప్రెజెంటేషన్ ద్వారా కమిషన్ చైర్మన్ జస్టిస్ పీసీ ఘోష్కు వెదిరె శ్రీరాం వివరించే అవకాశం ఉంది. ప్రాజెక్టుకు సంబంధించిన ప్రతి డాక్యుమెంట్నూ కమిషన్కు ఇవ్వనున్నట్టు తెలిసింది. ఇక విద్యుత్ శాఖ అధికారి కంచర్ల రఘు ఈ నెల 15న విచారణకు హాజరుకానున్నట్లు సమాచారం. ఆయన కూడా పవర్పాయింట్ ప్రెజెంటేషన్ ఇచ్చే అవకాశం ఉంది. కాగా, శుక్రవారం పలువురు ప్రైవేట్ వ్యక్తులను జస్టిస్ ఘోష్ కమిషన్ విచారించనున్నట్లు తెలిసింది.
