భద్రాచలం,వెలుగు: భద్రాచలంలో బొలేరో వెహికల్లో సీక్రెట్ చాంబర్ ఏర్పాటు చేసుకుని అక్రమంగా తరలిస్తున్న 280 కిలోల గంజాయిని పోలీసులు సోమవారం కాపుకాసి పట్టుకున్నారు. సీఐ నాగరాజురెడ్డి తెలిపిన వివరాల ప్రకారం.. ఏఎస్పీ పంకజ్ పారితోశ్ ఆదేశాలతో టౌన్ ఎస్సై మధుప్రసాద్ భద్రాచలం ఫారెస్ట్ చెక్ పోస్టు సమీపంలో తనిఖీలు చేస్తున్నారు. ఒడిశాలోని కలిమెల ప్రాంతం నుంచి బొలేరో వాహనంలో హైదరాబాద్కు చెందిన డ్రైవర్ మహ్మద్ జాఫర్ఖాన్, కర్నాటకలోని బీదర్కు చెందిన అజాజ్ అహ్మద్, ఫిరోజ్ఖాన్ గంజాయిని భద్రాచలం మీదుగా కర్నాటకు తీసుకెళ్తున్నారు. సీక్రెట్ చాంబరు ఏర్పాటు చేసుకుని అందులో 140 ప్యాకెట్ల గంజాయి పెట్టారు. ఒక్కో ప్యాకెట్ 2కిలోలు ఉంటుంది. దీని విలువ రూ.56లక్షలు ఉంటుంది. హైదరాబాద్కు చెందిన జహంగీర్ ఖురేషీ, ఎండీ మాసి ఉద్దీన్ బొలేరో వాహనంలో కలిమెల(ఒడిశా)లోని గంజాయి వ్యాపారి నుంచి కొనుగోలు చేసి భద్రాచలం, హైదరాబాద్ మీదుగా కర్నాటకకు తరలిస్తున్నారు. వాహనంతో పాటు, మూడు సెల్ఫోన్లు స్వాధీనం చేసుకుని నిందితులపై కేసు నమోదు చేసినట్లు సీఐ నాగరాజురెడ్డి వెల్లడించారు.
30 కేజీల గంజాయి పట్టివేత
జూలూరుపాడు: కొత్తగూడెం నుంచి తల్లాడ వెళ్లే రోడ్డు మార్గంలో అక్రమంగా గంజాయి తరలిస్తున్న కారును పట్టుకున్నారు. అనుమానాస్పద వ్యక్తులను అదుపులోకి తీసుకుని వారి నుంచి దాదాపు 30 కేజీల గంజాయి స్వాధీనం చేసుకున్నారు.
