హైదరాబాద్ లో గంజాయి అక్రమ రవాణా ఆగట్లేదు. కేటుగాళ్లు పోలీసుల కళ్లు గప్పి వివిధ మార్గాల్లో తరలిస్తుండటం కలకలం సృష్టిస్తోంది. నిత్యం ఏదో ఒక చోట గంజాయి పట్టుబడటం అది కూడా ఎక్కువ మొత్తాల్లో ఉండటం పోలీసులను విస్మయానికి గురి చేస్తోంది. తాజాగా రాచకొండ పోలీస్స్టేషన్ పరిధిలో భారీగా గంజాయి పట్టుకున్నారు. పోలీసులు తెలిపిన వివరాల ప్రకారం.. ఏపీలోని సీలేరు నుంచి ఆరుగురు నిందితులు హైదరాబాద్ మీదుగా మహారాష్ట్రకు అక్రమంగా గంజాయి తరలిస్తున్నారు.
చౌటుప్పల్దగ్గర ఎల్ బీ నగర్ ఎస్ వోటీ పోలీసులు తనిఖీలు నిర్వహిస్తున్నారు. తనిఖీలో రెండు కార్లలో తరలిస్తున్న రూ.40 లక్షల విలువైన 200 కిలోల గంజాయి పట్టుబడింది. కార్లలోని ఆరుగురు నిందితులను పోలీసులు అరెస్ట్ చేశారు. వారి నుంచి కార్లు, మొబైల్స్, గంజాయి స్వాధీనం చేసుకున్నారు. కేసు నమోదు చేసి దర్యాప్తు చేస్తున్నట్లు పోలీసులు వెల్లడించారు.
