రంగారెడ్డి జిల్లా మియాపూర్ లో విషాదం చోటు చేసుకుంది. కుక్కల దాడిలో ఆరేళ్ల బాలుడు మృతి చెందాడు. మియాపూర్ లో భిక్షాటన చేస్తున్న కుటుంబానికి చెందిన బాలుడు సాత్విక్.. జూన్ 4వ తేదీ మంగళవారం ఆడుకునేందుకు వెళ్లి తిరిగి రాలేదు. కుటుంబ సభ్యులు చుట్టుప్రక్కల ప్రాంతాల్లో వెతికినా ఆచూకీ దొరకలేదు.
ఈ క్రమంలో జూన్ 5వ తేదీ బుధవారం ఉదయం మక్తాలోని నిర్మానుష్య ప్రాంతంలో బాలుడి మృతదేహాన్ని స్థానికులు గర్తించారు. వెంటనే పోలీసులకు సమాచారం అందించారు. సంఘటనా స్థలానికి చేరుకున్న పోలీసులు.. బాలుడి ఒంటి మీద కుక్కలు దాడి చేసిన కాట్లు ఉన్నట్లు తెలిపారు. డంపింగ్ యార్డు కావడంతో కుక్కల బెడద ఎక్కువగా ఉందని స్థానికులు తెలిపారు. పోస్టుమార్టం నిమిత్తం బాలుడి మృతదేహాన్ని ఆస్పత్రికి తరలించారు. కేసు నమోదు చేసుకొని దర్యాప్తు చేస్తున్నారు పోలీసులు.
