భూమి లేకున్నా ధరణిలో ఎంట్రీ!..ఫీల్డ్లోని భూములకు, ధరణి రికార్డులకు 8 లక్షల ఎకరాలు తేడా

•  
• ఫీల్డ్ లోని భూములకు, ధరణి రికార్డులకు 8 లక్షల ఎకరాలు తేడా 
• ఇప్పటికే పరిష్కరించినవి పోగా.. ఇంకా 5.82 లక్షల ఎకరాలు ఎక్కువ
• ఏ జిల్లాలో చూసినా వేల ఎకరాల్లో తేడాలు.. పాస్​బుక్స్​లో భూమి ఎక్కువగా నమోదైనోళ్లు గప్ చుప్ 
• అక్రమంగా రైతుబంధు, క్రాప్ లోన్లు తీసుకున్నట్టు గుర్తింపు 
• భూమి తక్కువగా నమోదైన రైతులు ఆఫీసుల చుట్టూ చక్కర్లు  
• 1956 నాటి ఆర్ఎస్ఆర్ ఆధారంగా డిజిటల్ రికార్డులు సరిచేస్తున్న రెవెన్యూ శాఖ 

హైదరాబాద్, వెలుగు:ధరణి ముసుగులో జరిగిన​అక్రమాలను గుర్తించిన ప్రభుత్వం.. వాటిని సరిచేసే పనిలో పడింది. గత ప్రభుత్వ హయాంలో వివిధ బై సర్వే నెంబర్ల కింద అసలు భూవిస్తీర్ణం కన్నా 8 లక్షల ఎకరాలు ఎక్కువగా ధరణిలో నమోదైంది. దీంతో క్షేత్రస్థాయిలో రైతుల మధ్య  గొడవలు మొదలయ్యాయి. ధరణి వచ్చి మూడేండ్లు గడుస్తున్నా.. ఈ పంచాయితీలు తెగడం లేదు. డిజిటల్ రికార్డుల ఆధారంగా పాస్ బుక్స్ లో భూవిస్తీర్ణం ఎక్కువ పడినోళ్లు సమాచారం ఇవ్వాలని ఆఫీసర్లు కోరినా.. ఎవరూ చెప్పడం లేదు. అంతేకాకుండా అలా భూవిస్తీర్ణం ఎక్కువగా పడినోళ్లు అక్రమంగా రైతుబంధు పొందడంతో పాటు క్రాప్ లోన్లు కూడా తీసుకున్నట్టు అధికారులు గుర్తించారు. మరోవైపు తమకు ఉండాల్సిన భూమి కంటే తక్కువగా నమోదైన రైతులు.. అప్లికేషన్లు పట్టుకొని ఆఫీసుల చుట్టూ తిరుగుతున్నారు. రాష్ట్రవ్యాప్తంగా బేస్ సర్వే నెంబర్లలో ఉన్న భూవిస్తీర్ణం కన్నా 8 లక్షల ఎకరాలు ఎక్కువగా ధరణిలో నమోదైనట్లు ఆఫీసర్లు గుర్తించారు. ఇందులో ఇప్పటివరకు పరిష్కరించిన భూములను మినహాయిస్తే, మరో 5.82 లక్షల ఎకరాలు ఎక్కువగా చూపెడుతున్నది. ఇన్నాళ్లూ తక్కువ భూమి నమోదైన రైతుల అప్లికేషన్ల ఆధారంగా సమస్యలను పరిష్కరిస్తూ వచ్చిన  రెవెన్యూ యంత్రాంగం.. ఆ ప్రక్రియ ఆలస్యమవుతుండడంతో ఇప్పుడు రూట్​మార్చింది. 1956 నాటి సేత్వార్ రీసర్వే సెటిల్మెంట్​రిజిస్టర్​(ఆర్ఎస్ఆర్) ద్వారా డిజిటల్​ రికార్డులను సరిచేస్తున్నది. ఈ మేరకు కిందిస్థాయి అధికారులకు సైతం ఆదేశాలు ఇవ్వడంతో ఈ ప్రక్రియ వేగం పుంజుకుంది. 

అన్ని జిల్లాల్లో అంతే..  

రాష్ట్రంలోని ప్రతి జిల్లాలో ఆర్ఎస్ఆర్​కు, డిజిటల్​రికార్డులకు మధ్య వేలాది ఎకరాల్లో తేడాలు ఉన్నట్టు అధికారులు గుర్తించారు. ఆర్ఎస్ఆర్​ప్రకారం 32 జిల్లాల్లో బేస్​సర్వే నెంబర్లలో 26.98 లక్షల ఎకరాల భూములు ఉండగా, ప్రస్తుతం ధరణిలో (బై నెంబర్లతో కలిపి) 32.80 లక్షల ఎకరాలు చూపెడుతున్నది. అత్యధికంగా కుమ్రంభీమ్ ఆసిఫాబాద్ జిల్లాలో​ 90 వేల ఎకరాలు, ములుగులో 34 వేల ఎకరాలు, మేడ్చల్​మల్కాజ్​గిరిలో 16 వేల ఎకరాలు, రంగారెడ్డిలో 28 వేల ఎకరాలు, సంగారెడ్డిలో 16 వేల ఎకరాలు ఎక్కువగా ఉన్నట్టు అధికారులు గుర్తించారు. ఎక్కువ భూమి నమోదైనవాళ్లు సరిచేసుకునేందుకు ముందుకు రాకపోవడంతో రెవెన్యూ యంత్రాంగం ఆర్ఎస్ఆర్​ద్వారా డిజిటల్​రికార్డులను సరిచేస్తున్నది. ఒక్కో పాస్​బుక్​లో ఏకంగా 5 ఎకరాల వరకు తేడా ఉండడంతో అధికారులు షాక్​అవుతున్నారు. పాస్ బుక్స్ లో భూమి ఎక్కువగా నమోదైనవాళ్లకు పెట్టుబడి సాయం ఎక్కువగా వస్తున్నది. ఆఫీసర్లకు చెప్తే ఆ మొత్తం తగ్గిపోతుందని భావించే వాళ్లు చెప్పడం లేదని తెలిసింది. మరికొందరైతే  తమకు ఎక్కువ వచ్చిన విస్తీర్ణాన్ని అమ్ముకుంటున్న ఘటనలు వెలుగుచూస్తున్నాయి. దీంతో పొజిషన్​ కోసం క్షేత్రస్థాయిలో గొడవలు జరుగుతున్నాయి. 

రెవెన్యూ సిబ్బందికి తిప్పలు.. 

ఆర్ఎస్ఆర్, డిజిటల్​రికార్డులకు మధ్య ఉన్న గ్యాప్​ను గుర్తించేందుకు క్షేత్రస్థాయిలో అధికారులు నానాతిప్పలు పడుతున్నారు. మిస్సింగ్ సర్వే నెంబర్, మిస్సింగ్​ఎక్స్​టెంట్​కింద భూమి తక్కువగా ఉన్న రైతులు పెట్టుకున్న అప్లికేషన్లు, వారిచ్చిన ఆధారాలు, రిజిస్ట్రేషన్​డాక్యుమెంట్లు,సేత్వార్​రికార్డులను పట్టుకుని క్షుణ్నంగా పరిశీలిస్తున్నారు. దీంతో ఒక్కో రికార్డు వెరిఫికేషన్​కు చాలా టైమ్ తీసుకుంటున్నది. ఇక ఎక్కువ విస్తీర్ణం ఎంట్రీ అయిన రైతుల బై సర్వే నెంబర్లు గుర్తించి, వారికి నోటీసులు ఇచ్చి, వారి నుంచి భూమి వెనక్కి తీసుకోవడం కూడా ఓ టాస్కే అంటున్నారు. ఇందుకు చాలాచోట్ల భూయజమానులు సహరించడం లేదని రెవెన్యూ సిబ్బంది చెప్తున్నారు.