వనపర్తి, వెలుగు: బడులు రీ ఓపెన్ అయినా ప్రైవేట్ స్కూల్ యాజమాన్యాలు బడి బస్సులను ఫిట్నెస్ చేయించుకోవడంపై దృష్టి పెట్టడం లేదు. బడి బస్సుల ఫిట్నెస్ సక్రమంగా ఉంటేనే పిల్లలు స్కూల్కు క్షేమంగా వెళ్లి రాగలుగుతారు. కొన్ని సందర్భాల్లో ఫిట్నెస్ సరిగా లేని బస్సులు మొరాయించడంతో ఇబ్బంది పడుతున్నారు. ప్రతి ఏడాది స్కూల్ బస్సులను ఫిట్నెస్ చేయించుకుంటే ఎలాంటి ప్రాబ్లమ్ ఉండదని ఆర్టీఏ ఆఫీసర్లు చెబుతున్నారు.
నెల ముందు నుంచే..
స్కూళ్లు రీ ఓపెనింగ్కు నెల రోజుల ముందు నుంచే ప్రైవేట్ స్కూల్స్ మేనేజ్మెంట్లు తమ స్కూల్ బస్సులను ఫిట్నెస్ చేయించుకోవాలి. అన్ని సక్రమంగా ఉన్నాయని, బస్సులు నడిపేందుకు ఎలాంటి అభ్యంతరాలు లేవని ఆర్టీఏ ఆఫీస్ నుంచి సర్టిఫికెట్ పొందాలి. కానీ, ఇంకా 40 శాతం వరకు బస్సులు ఫిట్నెస్ చేయించుకోలేదు. ఫిట్నెస్ విషయంలో మేనేజ్మెంట్లు నిర్లక్ష్యం చూపుతున్నాయనే విమర్శలున్నాయి.
ఉమ్మడి జిల్లాలో ఇలా..
ఉమ్మడి మహబూబ్నగర్ జిల్లాలో 1,202 స్కూల్ బస్సులు ఉన్నాయి. ఇందులో 211 బస్సులకు మాత్రమే ఫిట్ నెస్ పరీక్షలు చేయించినట్లు ఆర్టీఏ అధికారులు చెబుతున్నారు. వనపర్తి జిల్లాలో 166 బస్సులు ఉండగా, 110 బస్సులకు ఫిట్నెస్ పరీక్షలు చేయించాల్సి ఉంది. నారాయణపేట జిల్లాలో 128 బస్సులు, వనపర్తిలో 166, జోగులాంబ గద్వాలలో 244, మహబూబ్నగర్లో 439 బస్సులు ఉండగా, 850 బస్సులు ఫిట్నెస్ పరీక్షలు చేయించుకోవాల్సి ఉందంటే పరిస్థితి
ఎలా ఉందో అర్థం చేసుకోవచ్చు.
ఆటోలపై చర్యలేవీ?
స్కూల్ బస్సుల ఫీజు ఎక్కువగా ఉండడంతో పాటు వివిధ కారణాలతో పేరెంట్స్ తమ పిల్లలను ఆటోల్లో స్కూళ్లకు పంపిస్తున్నారు. ఇదిలాఉంటే ఆటో వాలాలు ఫిట్నెస్ పరీక్షలు చేయించుకోకపోవడం, ఒక్కో ఆటోలో 10 మందికి పైగా విద్యార్థులను ఎక్కించుకుంటున్నారు. స్టూడెంట్ల బ్యాగులను ఆటోపై లేదంటే సైడ్లకు వేలాడదీస్తూ ప్రమాదకరంగా స్టూడెంట్లను తీసుకెళ్తున్నారు. దీంతో పేరెంట్స్ ఆందోళన వ్యక్తం చేస్తున్నారు. ఆటోలకు కూడా ఫిట్నెస్ తప్పనిసరి చేయడంతో పాటు పరిమితికి మించి విద్యార్థులను తరలించకుండా చూడాలని కోరుతున్నారు.
ఫిట్నెస్ లేకుంటే సీజ్ చేస్తాం..
జిల్లాలోని అన్ని స్కూల్ బస్సులను ఫిట్నెస్ పరీక్షలు చేయించుకుని నడపాలి. ఫిట్నెస్ లేకుండా నడిపితే ఆ బస్సులను సీజ్ చేస్తాం. ఇప్పటికే ఒక స్కూల్ బస్ సీజ్ చేశాం. ఆటోల్లో పరిమితికి మించి విద్యార్థులను తీసుకెళ్లవద్దు.
మానస, డీటీవో
