- వీరిలో ఎక్కువ మంది కొత్తగూడెం, ములుగు జిల్లాల వాళ్లే
- లొంగిపోయిన వారిలో 27 మంది మిలీషియా సభ్యులు
- వివరాలు వెల్లడించిన ఐజీపీ చంద్రశేఖర్రెడ్డి
- ఫలితాలిస్తున్న ‘ఆపరేషన్ చేయూత’
భద్రాద్రి కొత్తగూడెం, వెలుగు: కొత్తగూడెం జిల్లా పోలీసుల ఎదుట శనివారం 86 మంది మావోయిస్టులు లొంగిపోయారు. కొత్తగూడెంలోని హేమచంద్రాపురం పోలీస్ హెడ్ క్వార్టర్లో మల్టీ జోన్–1 ఐజీపీ చంద్రశేఖర్, భద్రాద్రి కొత్తగూడెం ఎస్పీ రోహిత్ రాజు మీడియాకు వివరాలను వెల్లడించారు. పోలీసులు చేపట్టిన ఆపరేషన్ చేయూత మంచి ఫలితాలు ఇస్తున్నదని చెప్పారు.
లొంగిపోయిన వారిలో కొత్తగూడెం, ములుగు జిల్లాలకు చెందిన వారే ఎక్కువగా ఉన్నారన్నారు. నలుగురు ఏసీఎం స్థాయి, పార్టీ మెంబర్స్ ఐదుగురు, 27 మంది మిలీషియా సభ్యులతో పాటు పలు శాఖలకు చెందిన వారు లొంగిపోయిన వారిలో ఉన్నారని తెలిపారు. ఈ ఏడాది ఇప్పటి వరకు కొత్తగూడెం, ములుగు జిల్లాల్లో కలిపి 224 మంది మావోయిస్టులు లొంగిపోయారన్నారు.
ప్రజల్లో మావోయిస్టులకు ఆదరణ లేదని, మావోయిస్టులు జనజీవన స్రవంతిలో కలిసేందుకు ముందుకు రావాలన్నారు. లొంగిపోయిన మావోయిస్టులకు నగదు ప్రోత్సాహకాలు అందజేశారు. మీడియా సమావేశంలో సీఆర్పీఎఫ్ ఆఫీసర్లు, పోలీస్ అధికారులు పాల్గొన్నారు.
