భద్రాద్రి కొత్తగూడెం, వెలుగు : ఫోన్ రీచార్జీకి 200 కావాలని తల్లిని అడగ్గా తన దగ్గర లేవని చెప్పడంతో మనస్తాపంతో ఓ కొడుకు ఉరేసుకున్నాడు. అయితే మృతదేహాన్ని పోస్ట్మార్టం కోసం మెడికల్ కాలేజీకి అనుబంధంగా ఉన్న సర్కారు దవాఖాన మార్చురీకి తీసుకువెళ్లగా అక్కడి సిబ్బంది రూ.9 వేలు వసూలు చేశారు. భద్రాద్రి కొత్తగూడెం జిల్లాలో జరిగిన ఈ అమానవీయ ఘటనను కొందరు వీడియో తీసి సోషల్మీడియాలో పెట్టడంతో విషయం వెలుగులోకి వచ్చింది. అశ్వారావుపేట మండలం నారాయణపురం గ్రామానికి చెందిన ఎడవల్లి సురేందర్(25) ఫోన్రీచార్జీ చేయించాలని తన తల్లిని రూ. 200 అడిగారు. కూలి పనిచేసుకునే ఆమె తన దగ్గర లేవని చెప్పడంతో సోమవారం రాత్రి పురుగుల మందు తాగాడు. అతడిని అశ్వారావుపేటలోని గవర్నమెంట్ హాస్పిటల్కు, అక్కడి నుంచి కొత్తగూడెంలోని మెడికల్ కాలేజీకి అనుబంధంగా ఉన్న గవర్నమెంట్హాస్పిటల్కు తరలించారు. పరిస్థితి విషమించి సురేందర్చనిపోయాడు.
పైసలిస్తే గాని చేసేది లేదన్నరు
సురేందర్ మృత దేహానికి గురువారం పోస్ట్మార్టం చేయాల్సి ఉండగా, రూ.9వేలు ఇస్తేనే చేస్తామని పోస్ట్మార్టం అసిస్టెంట్ హరిరాం, ఔట్సోర్సింగ్ ఎంఎన్ఓ నాగరాజు డిమాండ్ చేశారు. తాను పేదదాన్నని అంత ఇచ్చుకోలేనని వేడుకున్నా వినలేదు. శవాన్ని లోపలే పెట్టి రూమ్కు తాళం వేశారు. దీంతో తప్పని పరిస్థితుల్లో మృతుడి బంధువులు, స్నేహితులు చందాలు పోగేసుకుని పోస్ట్మార్టం చేసే వ్యక్తికి రూ. 3వేలు, చాప, డబ్బాలు, ఇతర సామగ్రికి రూ.1500, రూం క్లీనింగ్కు రూ. 500, ఫొటోలు తీసిన వ్యక్తికి రూ. వెయ్యి, ఇతర ఖర్చులకు రూ. 3వేలను ఇచ్చారు. మృతదేహాన్ని గ్రామానికి తీసుకెళ్లేందుకు మరో రూ. 5వేలకు పైగా ఖర్చు చేయాల్సి వచ్చింది. సిబ్బంది డబ్బులడుగుతుండగా వీడియో తీసి సూపరింటెండెంట్కు పంపించినా స్పందన లేదని, ఫోన్ చేసినా లిఫ్ట్ చేయలేదని సురేందర్ కుటుంబసభ్యులు ఆరోపించారు. ఈ ఘటనకు బాధ్యులను ఉద్యోగంలోంచి తొలగించామని సూపరింటెండెంట్ డాక్టర్ కుమారస్వామి తెలిపారు. తనకు వీడియోలు పంపించింది నిజమేనని, రాత్రి వేళ కావడంతో తెల్లారిన తర్వాత విచారణ జరిపి చర్యలు తీసుకున్నామన్నారు
