ఏదైనా సాధించాలనే గోల్ ఉంటే దానికి వయసుతో సంబంధం లేదనడానికి ఈ చిన్నారే నిదర్శనం. ఈ పాప ప్రపంచ షావోలిన్ కుంగ్ ఫూ చాంపియన్షిప్ టైటిల్ సొంతం చేసుకున్న పది మందిలో ఒకరిగా నిలిచింది.
ప్రపంచ షావోలిన్ కుంగ్ ఫూ చాంపియన్ షిప్ ప్రతిఏటా నిర్వహిస్తారు. గతేడాది ఈ పోటీకి ప్రపంచవ్యాప్తంగా మిలియన్ల మంది హాజరవుతారు. గతేడాది 124 మంది కుంగ్ ఫూ మాస్టర్లతో ఇంటర్నేషనల్ గ్రూప్ సెంట్రల్ చైనాలో ఈ పోటీ నిర్వహించింది. అందులో భాగంగా హెనాన్ ప్రావిన్స్కు చెందిన జాంగ్ సిక్సువాన్ పార్టిసిపేట్ చేసింది. ఈ చిన్నారి వయసు అప్పుడు తొమ్మిదేండ్లు. అప్పటికే నాలుగేండ్ల నుంచి శిక్షణ తీసుకుంటోంది. అయితే, పోటీలో తాను ప్రపంచ షావోలిన్ గేమ్స్లో చాలా ఫేమస్ అయిన కుంగ్ ఫూ మాస్టర్స్ను ఓడించింది. దీంతో ‘షావోలిన్ కుంగ్ ఫూ స్టార్’ టైటిల్ చిన్నారి జాంగ్కు సొంతమైంది.
ఈ చిన్నారి ప్రదర్శన చేసిన వీడియో ప్రస్తుతం సోషల్ మీడియాలో ట్రెండ్ అవుతోంది. అందులో ఈ చిన్నారి తన బాడీని రబ్బర్లా వంచుతూ అవలీలగా విన్యాసాలు చేసింది. అది చూసిన మాస్టర్లంతా ఆశ్చర్యపోయారు. ఇప్పటికి పది మంది మాత్రమే షావోలిన్ కుంగ్ ఫూ స్టార్ టైటిల్ సాధించగలిగారు. ఆ లిస్ట్లో జాంగ్ సిక్సువాన్ కూడా చేరింది. ఇంత చిన్నవయసులోనే జాంగ్ ఈ టైటిల్ సాధించడంతో ఆమె గురువు జావో జెన్వు ఏమన్నారంటే.. ఆమెకు మార్షల్ ఆర్ట్స్ అంటే ఎంతో ఇష్టమని, చీకటి పడిన తర్వాత కూడా ప్రాక్టీస్ చేసేదని చెప్పారు.
