నిజామాబాద్, కామారెడ్డి టౌన్, వెలుగు: నిజామాబాద్లోని ఆరు అసెంబ్లీ సెగ్మెంట్లలో (బాన్సువాడతో కలిపి) ఆఖరు రోజు మొత్తం 95 నామినేషన్లు వచ్చాయి. ప్రధాన పార్టీల అభ్యర్థులు మరో సెట్నామినేషన్ వేశారు. కొందరు అభ్యర్థులు తమ భార్య, చెల్లి, కొడుకులతో నామినేషన్లు వేయించారు. పొలిటికల్ పార్టీలతో పాటు ఇండిపెండెంట్లు పోటీకి సిద్ధపడి నామినేషన్లు వేశారు. ఈనెల 3న నామినేషన్ల స్వీకరణ షురూ కాగా శుక్రవారం ముగిసేనాటికి జిల్లాలో మొత్తం 165 నామినేషన్లు దాఖలయ్యాయి.
అత్యధికంగా అర్బన్ నియోజకవర్గం నుంచి 46, ఆర్మూర్నుంచి 35, బోధన్లో 28, రూరల్లో 20, బాన్సువాడ, బాల్కొండలో 18 చొప్పున నామినేషన్లు అందాయి. కామారెడ్డిలో చివరి రోజు 21 మంది 45 సెట్లు, ఎల్లారెడ్డిలో 16 మంది 27 సెట్లు, జుక్కల్లో 17 మంది 24 సెట్ల నామినేషన్లు వచ్చాయి. మొత్తంగా కామారెడ్డిలో 103, ఎల్లారెడ్డిలో 42, జుక్కల్లో 50 సెట్ల నామినేషన్లు వచ్చాయి. కామారెడ్డిలో కాంగ్రెస్ అభ్యర్థి రేవంత్రెడ్డి నామినేషన్ వేశారు. బీఆర్ఎస్ అభ్యర్థి కేసీఆర్తరఫున ఆ పార్టీ లీడర్లు రెండు సెట్ల నామినేషన్లు వేయగా, బీజేపీ అభ్యర్థి వెంకటరమణారెడ్డి తరఫున కూడా ఆ పార్టీ లీడర్లు నామినేషన్ వేశారు.
తల్లి ఆశీర్వాదంతో..
ఎల్లారెడ్డి బీఆర్ఎస్ అభ్యర్థి, సిట్టింగ్ ఎమ్మెల్యే జాజాల సురేందర్ శుక్రవారం నామినేషన్ దాఖలు చేశారు. సురేందర్ సొంత గ్రామమైన లింగంపేట మండలం నల్లమగుడు లోని ఆంజనేయ స్వామి ఆలయంలో ప్రత్యేక పూజలు చేశారు. అనంతరం తన తల్లి హన్మవ్వ కాళ్లు మొక్కి ఆశీర్వాదం తీసుకున్నారు. అనంతరం ఎల్లారెడ్డిలో నామినేషన్ వేశారు. 2018లో సురేందర్ కాంగ్రెస్ పార్టీ నుంచి పోటీ చేసి గెలిచారు. అనంతరం బీఆర్ఎస్లో చేరారు. ఈ ఎన్నికల్లో మొదటిసారి బీఆర్ఎస్ నుంచి పోటీ చేస్తున్నారు.-
– లింగంపేట
