నల్గొండ జిల్లా చిట్యాల మండలంలోని గుండ్రాంపల్లి వద్ద ప్రమాదం జరిగింది. శుక్రవారం (నవంబర్ 1) అర్థరాత్రి జాతీయ రహదారిపై ప్రయాణిస్తోన్న కారులో ఒక్కసారిగా మంటలు చెలరేగాయి. కారులో మంటలు గమనించిన డ్రైవర్ వెంటనే అప్రమత్తమై దిగడంతో ప్రమాదం తప్పింది. ఈ ఘటనలో కారు పూర్తిగా దగ్ధం అయ్యింది. సమాచారం అందుకున్న పోలీసులు ఘటన స్థలానికి చేరుకుని ప్రమాదానికి గల కారణాలపై ఆరా తీశారు. షార్ట్ సర్క్యూట్ కారణంగానే కారులో మంటలు చెలరేగినట్లు పోలీసులు ప్రాథమికంగా నిర్ధారించారు. కాగా, ఈ ఘటనకు సంబంధించిన పూర్తి వివరాలు తెలియాల్సి ఉంది.
