- తప్పిన పెను ప్రమాదం
- షార్ట్ సర్క్యూటే కారణం
హనుమకొండ, వెలుగు : హనుమకొండలోని గవర్నమెంట్ మెటర్నిటీ హాస్పిటల్(జీఎంహెచ్)లో శుక్రవారం అగ్నిప్రమాదం జరిగింది. షార్ట్సర్క్యూట్ కారణంగా ప్రమాదం జరగ్గా స్టోర్రూమ్లోని బ్లీచింగ్ పౌడర్, చీపుర్లు, యాసిడ్బాటిల్స్, ఇతర సామగ్రి దగ్ధమయ్యాయి. గమనించిన సిబ్బంది ఫైర్ డిపార్ట్మెంట్కు సమాచారం ఇవ్వడంతో వారు వచ్చి మంటలను ఆర్పేశారు.
స్టోర్ రూమ్ హాస్పిటల్ వెనుక వైపు ఉండడంతో పెద్ద ప్రమాదం తప్పింది. కానీ, ఒక్కసారిగా మంటలు, దట్టమైన పొగ వ్యాపించడంతో దవాఖానకు వచ్చిన గర్భిణులు, బాలింతలు భయపడ్డారు. ప్రమాదంతో దవాఖానలో కొద్దిసేపు కరెంట్సరఫరా ఆగిపోవడంతో వివిధ పరీక్షల కోసం దూరప్రాంతాల నుంచి వచ్చిన గర్భిణులు అవస్థలు పడాల్సి వచ్చింది. విషయం తెలుసుకున్న హనుమకొండ ఆర్డీవో ఎల్.రమేశ్ దవాఖానకు వచ్చి స్టోర్ రూమ్ను పరిశీలించి నష్టంపై ఆరా తీశారు. ఘటనపై పూర్తి విచారణ జరిపి నివేదికను కలెక్టర్ సిక్తా పట్నాయక్ కు అందజేయనున్నట్లు ఆర్డీవో తెలిపారు.
