కాశీబుగ్గ, వెలుగు : బైక్ దొంగల ముఠాను ప్రత్యేక క్రైమ్ పోలీసులు అరెస్టు చేశారు. గురువారం వరంగల్ ఇంతేజార్గంజ్ పోలీస్ స్టేషన్లో ఏర్పాటు చేసిన ప్రెస్ మీట్లో వరంగల్ ఏసీపీ నందిరామ్ నాయక్ వివరాలు వెల్లడించారు. వరంగల్ ఇంతేజార్గంజ్ పోలీస్ స్టేషన్ పరిధిలో మూడు నెలల నుంచి బైక్ దొంగతనాలు జరుగుతున్నాయని బాధితులు ఇచ్చిన ఫిర్యాదుల మేరకు ప్రత్యేక క్రైమ్ పార్టీని ఏర్పాటు చేశామన్నారు. ఆ ప్రత్యేక టీం గురువారం వరంగల్ చౌరస్తా, పోస్ట్ ఆఫీస్ ల వద్ద వాహనాల తనిఖీ చేస్తుండగా, ముగ్గురు వ్యక్తులు బైక్పై వెళ్తూ తారసపడ్డారు.
పోలీసులను చూసి పారిపోతుండగా, పట్టుకుని విచారించగా రంగు ప్రశాంత్, ఈసెంఎల్లి ప్రేమ్ కుమార్, ఓ మైనర్ బాలుడిగా గుర్తించామన్నారు. వారు మద్యం, జల్సాలకు అలవాటు పడి ముఠాగా ఏర్పడ్డారని, సులభంగా డబ్బు సంపాదించాలని బైక్ దొంగతనం నిశ్చయించుకొన్నట్లు తెలిపారు. వరంగల్ సెంట్రల్ జోన్ పరిధిలోని మిల్స్ కాలనీ, ఇంతేజార్ గంజ్, మట్టేవాడ, సుబేదారి, హన్మకొండలో మూడు నెలల నుంచి మొత్తం 8 మోటర్ సైకిల్స్ దొంగతనం చేసి, నష్కల్ గ్రామానికి చెందిన రంగు ప్రశాంత్ ఇంటి వద్ద ఉన్న నరసింహారావు హాస్పిటల్ దగ్గర పార్కింగ్ లాగా ఏర్పాటు చేశాడు.
తెలిసిన వారికి మాటలు చెప్తూ తక్కువ ధరకు బైకులు అమ్ముతున్నారు. గురువారం మూడు బైక్లను ఇవ్వడానికి వెళ్తుండగా, పోలీసులకు పట్టుబడ్డారు. మిగతా 5 బైక్లను నరసింహారావు హాస్పిటల్ దగ్గర పోలీసులు స్వాధీనపరుచుకుని, రూ. 10 వేలు సీజ్ చేసి అదుపులోకి తీసుకుని రిమాండ్ కు పంపినట్లు ఏసీపీ తెలిపారు. దొంగలను పట్టుకోవడంలో ప్రతిభ కనబర్చిన వారిని ఏసీపీ అభినందించారు.
