- గిరిజన దంపతులను విచారించిన సీడబ్ల్యూసీ అధికారులు
- పసిపాపను స్వాధీనం చేసుకుని శిశు గృహకు తరలింపు
యాదాద్రి, వెలుగు : మూడోసారి కూడా ఆడపిల్ల పుట్టిందని తల్లిదండ్రులు దత్తత ఇచ్చి వదిలించుకున్నారు. ఇది కాస్త చైల్డ్వెల్ఫేర్ ఆఫీసర్లకు తెలియడంతో చిన్నారిని స్వాధీనం చేసుకుని శిశుగృహకు తరలించారు. వివరాల్లోకి వెళ్తే.. యాదాద్రి జిల్లా తుర్కపల్లి మండలం రాంపూర్తండాకు చెందిన గిరిజన దంపతులకు ఇద్దరు కూతుళ్లు ఉన్నారు. కొడుకు కోసం మూడోసారి భార్య గర్భం ధరించింది. గత నెల 2న హైదరాబాద్లోని మెడిసిటీ హాస్పిటల్లో పాప పుట్టింది.
మళ్లీ ఆడపిల్లనే పుట్టడంతో నిరాశతో దంపతులు తండాకు చెందిన తెలిసిన వ్యక్తి ద్వారా సిద్దిపేట జిల్లా గజ్వేల్కు చెందిన పిల్లలు లేని ఓ జంటకు దత్తత ఇచ్చారు. ఇటీవల తండాకు వచ్చిన గిరిజన దంపతులను అంగన్వాడీ సిబ్బంది వెళ్లి వివరాలు అడిగారు. పాప హాస్పిటల్ లో ఉందంటూ చెప్పగా అనుమానంతో ఆరా తీసి నిలదీయడంతో దత్తత ఇచ్చినట్టు తెలిపారు. అక్రమ దత్తత నేరమని, వెంటనే పాపను తీసుకొని రావాలని దంపతులకు సూచించారు.
దీంతో గజ్వేల్కు వెళ్లి పాపను తీసుకొచ్చి మంగళవారం రాత్రి ఐసీడీఎస్ ఆఫీసులో అప్పగించారు. అనంతరం సీడబ్ల్యూసీ చైర్మన్ బండారు జయశ్రీ, మెంబర్స్ పాపను దత్తత ఇచ్చిన దంపతులను, పొందిన భార్యభర్తలను ప్రశ్నించినా సరైన వివరాలు చెప్పలేదు. దీనిపై మరింత విచారణ జరిపిన తర్వాత పాపను అప్పగిస్తామని అధికారులు స్పష్టం చేశారు. అనంతరం పాపను శిశు గృహకు తరలించారు.
