మేడిగడ్డలో కుంగిన పిల్లర్ల కింద భారీ గ్యాప్

• మేడిగడ్డలోని ఏడో బ్లాక్​లో పెద్ద రంధ్రం గుర్తించిన అధికారులు 
• దాని వల్లే రెండు గేట్లను ఎత్తలేని పరిస్థితి
• పూడ్చకపోతే పక్క బ్లాక్​లపైనా ప్రభావం పడే చాన్స్ 
• ఏదేమైనా ఎన్డీఎస్ఏ కమిటీ సిఫార్సుల మేరకే ముందుకెళ్లాలని నిర్ణయం  
• మూడు బ్యారేజీలను పరిశీలించిన సీడబ్ల్యూపీఆర్ఎస్ ఎక్స్ పర్ట్స్ 
• స్పెషల్ టెక్నికల్ కమిటీ ఏర్పాటుపై అధికారుల కసరత్తు 

హైదరాబాద్, వెలుగు: మేడిగడ్డ బ్యారేజీలో ఏడో బ్లాక్​లోని కుంగిన పిల్లర్ల కింద భారీ రంధ్రం (వాయిడ్) ఉన్నట్టు అధికారులు గుర్తించారు. నేషనల్​డ్యామ్​సేఫ్టీ అథారిటీ (ఎన్​డీఎస్ఏ) నిపుణుల కమిటీ సిఫార్సుల మేరకు ఇప్పటికే మేడిగడ్డ, అన్నారం, సుందిళ్ల బ్యారేజీల వద్ద రిపేర్లు మొదలుపెట్టిన అధికారులు.. ఆయా బ్యారేజీల గేట్లను పైకి ఎత్తుతున్నారు. మేడిగడ్డలోని ఏడో బ్లాక్​లో ఉన్న 8 గేట్లలో ఇప్పటికే ఐదు గేట్లను పైకి ఎత్తారు. మరో మూడు గేట్లను ఎత్తాల్సి ఉంది. కుంగిన పిల్లర్ల పక్కన ఉన్న 20, 21 నెంబర్​గేట్లను ఎత్తడానికి బదులు పూర్తిగా తొలగించాలని ఎన్​డీఎస్ఏ కమిటీ సూచించింది. 

అయితే, ఆ బ్లాక్​లో కుంగిన పిల్లర్ల కింద భారీ రంధ్రం ఉండడం వల్లే ఆ గేట్లను ఎత్తలేని పరిస్థితి ఉందని అధికారులు చెప్తున్నారు. ఒకవేళ ఆ రంధ్రాన్ని పూడ్చకుండా గేట్లను ఎత్తేందుకు ప్రయత్నిస్తే, దాని భారం పిల్లర్ల కింది భాగంలో పడే అవకాశం ఉంటుందని అంటున్నారు. ఈ క్రమంలోనే గేట్లను పూర్తిగా తొలగించే బదులు, ఆ రంధ్రాన్ని కాంక్రీట్​లేదా ఇతర మిశ్రమాలతో పూడ్చి గేట్లను పైకెత్తే ఏర్పాట్లు చేస్తే బాగుంటుందని అభిప్రాయపడుతున్నారు.

రంధ్రం కూడా స్ట్రెయిట్​గా లేదని, వంకరటింకరగా ఉందని చెబుతున్నారు. అది ఎంత పెద్దగా ఉందో చెప్పలేమని, అందుకోసం వివిధ టెస్టులు చేయాల్సి ఉంటుందని అంటున్నారు. ఆ రంధ్రాన్ని పూడ్చడమే అతిపెద్ద టాస్క్​అని చెబుతున్న అధికారులు.. దాన్ని అలాగే వదిలేస్తే ఏడో బ్లాక్​ పక్కన ఉండే బ్లాక్​లపైనా ప్రభావం పడే అవకాశం ఉంటుందని అనుమానాలు వ్యక్తం చేస్తున్నారు. ఏదేమైనప్పటికీ ఎన్​డీఎస్ఏ నిపుణుల కమిటీ చేసిన సిఫార్సుల మేరకే తాము ముందుకెళ్తామని అధికారులు స్పష్టం చేస్తున్నారు.  

నేడు అధికారులతో నిపుణుల భేటీ.. 

ఎన్డీఎస్ఏ నిపుణుల కమిటీ సిఫార్సుల మేరకు ఇప్పటికే సీడబ్ల్యూపీఆర్ఎస్​(సెంట్రల్​వాటర్ అండ్​పవర్ రీసెర్చ్​స్టేషన్), నేషనల్ ​జియో ఫిజికల్ ​రీసెర్చ్ ఇనిస్టిట్యూట్​(ఎన్జీఆర్​ఐ), సెంట్రల్​సాయిల్ అండ్ మెటీరియల్ రీసెర్చ్ స్టేషన్ (సీఎస్ఎంఆర్ఎస్) నిపుణులకు రాష్ట్ర సర్కార్ లేఖ రాసింది. ఈ నేపథ్యం లో బుధవారం సీడబ్ల్యూపీఆర్ఎస్​కు చెందిన ముగ్గురు నిపుణులు మేడిగడ్డ, అన్నారం, సుందిళ్ల బ్యారేజీలను పరిశీలించారు.

జియోటెక్నికల్​ఇన్వెస్టి గేషన్స్​కోసం సైంటిస్ట్ డాక్టర్ జె.ఎస్.ఎడ్లబడ్కర్, జియోఫిజికల్​ఇన్వెస్టిగేషన్స్​కోసం సైంటిస్ట్ ​ధనుంజయ నాయుడు, నాన్ ​డిస్ట్రక్టివ్ ​టెస్ట్ ​ఇన్వెస్టిగేషన్స్ ​కోసం ప్రకాశ్​పాలిని సీడబ్ల్యూపీఆర్ఎస్ పంపించింది. బ్యారేజీల వద్ద పరిస్థితులను అధ్యయనం చేసిన నిపుణులు.. గురువారం జలసౌధలో ఇరిగేషన్​ సెక్రటరీ రాహుల్​ బొజ్జా, స్పెషల్ ​సెక్రటరీ ప్రశాంత్ ​జీవన్​పాటిల్, ఈఎన్​సీలు అనిల్​కుమార్, నాగేందర్​రావు తదితర అధికారులతో సమావేశం కానున్నారు. బ్యారేజీల పరిస్థితిపై చర్చించనున్నారు.  

టెక్నికల్ కమిటీలో ఐఐటీ, ఎన్ఐటీ ఎక్స్​పర్ట్స్  

కాళేశ్వరం ప్రాజెక్టు అక్రమాలపై ఏర్పాటు చేసిన జ్యుడీషియల్​ కమిషన్​ఆదేశాల మేరకు స్పెషల్ టెక్ని కల్ కమిటీ ఏర్పాటుపై ఆఫీసర్ల కసరత్తు చేస్తున్నారు. జ్యుడీషియల్​ కమిషన్ చైర్​పర్సన్ ​జస్టిస్ పినాకి చంద్రఘోష్ ​ఇప్పటికే రెండుసార్లు హైదరాబాద్​కు వచ్చారు. మాజీ ఈఎన్​సీ వెంకటేశ్వర్​రావుతో పాటు అధికారులతో భేటీ అయ్యారు. బ్యారేజీలపై మరింత సమాచారం కోసం ఇరిగేషన్ ​డిపార్ట్​మెంట్​తో సంబంధం లేని సాంకేతిక నిపు ణులతో ఓ స్పెషల్​టెక్నికల్ కమిటీని ఏర్పాటు చే యాలని జస్టిస్ పీసీ ఘోష్​ ఆదేశించారు.

కమిటీ ఏర్పాటుపై అధికారులు ప్రతిపాదనలు సిద్ధం చేస్తున్నారు. నలుగురు లేదా ఆరుగురు సభ్యులతో కమిటీ ఏర్పాటు చేయాలని భావిస్తున్నట్టు తెలిసింది. ఐఐటీ, ఎన్ఐటీ లేదా ఇతర ప్రభుత్వ ఉన్నత సంస్థల్లోని టెక్నికల్​ఎక్స్​పర్ట్స్ జాబితాను సిద్ధం చేసి సర్కార్ కు ప్రతిపాదించనున్నారు. జూన్ మొదటి వారంలో జస్టిస్​పీసీ ఘోష్ ​మరోసారి రాష్ట్రానికి రానున్నారు. ఈ క్రమంలోనే స్పెషల్​ టెక్నికల్ కమిటీని వీలైనంత త్వరగా ఏర్పాటు చేయాలని అధికారులు భావిస్తున్నారు. 

షీట్​ పైల్స్​ వస్తున్నయ్..

బ్యారేజీల రిపేర్ల పనులను వేగంగా చేస్తున్నట్టు అధికారులు చెబుతున్నారు. ఈ క్రమంలోనే దెబ్బతిన్న షీట్​పైల్స్​ స్థానంలో కొత్త షీట్​పైల్స్​ను మారుస్తున్నట్టు చెప్పారు. గురువారం నాటికి షీట్​పైల్స్​బ్యారేజీల వద్దకు చేరుకుంటాయని తెలిపారు. మరోవైపు జియోటెక్నికల్​ఇన్వెస్టిగేషన్స్​లో భాగంగా ఎన్డీఎస్ఏ నిపుణుల కమిటీ బోర్ డ్రిల్లింగ్​చేసి టెస్టులు చేయాలని చెప్పింది.

దీంతో ఇప్పటికే బోర్​డ్రిల్లింగ్​మెషిన్లను కూడా అధికారులు తెప్పించినట్టు తెలిసింది. జియోఫిజికల్​ఇన్వెస్టిగేషన్​లో భాగంగా బ్యారేజీల్లోని ఎగువ, దిగువ పిల్లర్ల వద్ద సాయిల్ శాంపిళ్లను తీసుకుని పటిష్ఠతను పరిశీలించనున్నారు. జియోటెక్నికల్​ఇన్వెస్టిగేషన్​లో భాగంగా డ్రిల్లింగ్​చేసి పిల్లర్ల కిందకు సెన్సర్లను పంపించి అక్కడి పరిస్థితులను అంచనా వేస్తారు. ఎన్​డీటీ ఇన్వెస్టిగేషన్​లో భాగంగా పెద్ద వరద వచ్చినా పిల్లర్లు, షీట్​పైల్స్​, సీకెంట్​పైల్స్​వంటివి ఎంత మేరకు తట్టుకుంటాయన్న దానిపై విశ్లేషణ చేస్తారు.