చనిపోయిన తల్లిని బతికిస్తాడని మంచిర్యాల జిల్లా సోమగూడేం కల్వరి చర్చికి హైదరాబాద్ నుంచి డెడ్బాడీని శుక్రవారం ఓ కొడుకు తీసుకురావడం హాట్టాపిక్గా మారింది. ఏపీలోని రాజమండ్రికి చెందిన మణికుమారి హైదరాబాద్లో ట్రీట్మెంట్ తీసుకుంటూ గురువారం చనిపోగా చర్చి పాస్టర్ ముట్టుకుంటే బతుకుతుందని, ప్రార్థనలు చేస్తే స్వర్గానికి వెళ్తుందని సోమగూడం కల్వరీ మినిస్ట్రీకి అంబులెన్స్లో తీసుకొచ్చారు.
ఈ క్రమంలో చర్చి సిబ్బంది లోపలికి అనుమతించకపోవడంతో పాటు సమీపంలో ఉండేందుకు నిరాకరించారు. దీంతో పాత బెల్లంపల్లి రోడ్డు వద్ద వెహికల్ నిలిపి వేచి చూశారు. స్థానిక మీడియాకు తెలియడంతో అక్కడికి వెళ్లగా.. తన తల్లి చనిపోయిందని ఇక్కడి పాస్టర్ దైవసమానుడు అని టీవీల్లో ప్రచారం, ప్రార్థనలు చూసి నమ్మకంతో వచ్చినట్లు కొడుకు తెలిపారు. విషయం తెలుసుకున్న కాసీపేట ఎస్సై గంగారాం వారికి నచ్చజెప్పి తిప్పి పంపించారు.
