- వరంగల్ పోక్సో స్పెషల్ కోర్టు తీర్పు
- బాధితురాలికి రూ.5.5 లక్షల పరిహారం చెల్లించాలని ఆదేశం
హనుమకొండ, వెలుగు : మానసిక వికలాంగురాలైన బాలికపై అత్యాచారానికి పాల్పడిన వ్యక్తికి వరంగల్ పోక్సో స్పెషల్ కోర్టు 20 ఏండ్ల కఠిన కారాగార శిక్ష విధించింది. అంతేకాకుండా బాధితురాలికి పరిహారంగా రూ.5.5 లక్షలు చెల్లించాలని ఆదేశాలు జారీ చేసింది. పోక్సో కోర్టు పీపీ మొలుగూరి రంజిత్ తెలిపిన వివరాల ప్రకారం.. వరంగల్ జిల్లా మామునూరు పీఎస్ పరిధికి చెందిన మానసిక వికలాంగురాలిపై తేజావత్ హచ్చు అనే యువకుడు 2019 నవంబర్ 6న అత్యాచారం చేశాడు.
ఇంట్లో ఎవరూలేని సమయంలో బాలికపై అఘాయిత్యానికి పాల్పడ్డాడు. బాధితురాలు సైగలతో తన తల్లిదండ్రులకు విషయాన్ని చెప్పింది. దీంతో ఆమె పేరెంట్స్ నవంబర్ 7న మామునూరు పోలీస్ స్టేషన్లో ఫిర్యాదు చేశారు.
కేసు నమోదు చేసిన పోలీసులు విచారణ చేపట్టారు. అయితే బాధితురాలికి మానసిక స్థితి సరిగా లేకపోవడంతో పోక్సో కోర్టు పీపీ మొలుగూరి రంజిత్ స్పెషల్ ఎడ్యుకేటర్స్తో విచారణ చేపట్టి, సాక్ష్యాధారాలు సమర్పించారు. దీంతో తేజావత్ హచ్చును వరంగల్ పోక్సో స్పెషల్ కోర్టు దోషిగా నిర్ధారించింది. అతనికి కోర్టు ఇన్చార్జిజడ్జి సత్యేంద్ర 20 ఏండ్ల కఠిన కారాగార శిక్ష విధించారు. దానితో పాటు బాధితురాలికి రూ.5.5 లక్షల పరిహారం చెల్లించాలని ఆదేశించారు.
