‘హాత్ సే హాత్ జోడో’ మీటింగ్కు వెళ్లండి
సీనియర్ నేతలకు ఖర్గే ఫోన్
ఇయ్యాల ఉదయం నుంచి సాయంత్రం దాకా శిక్షణ
హైదరాబాద్, వెలుగు : భారత్ జోడో యాత్రకు సమాంతరంగా గ్రామగ్రామాన కాంగ్రెస్ ఆశయాలు, సమస్యలపై పోరాటాలను ప్రజల్లోకి తీసుకెళ్లేందుకు తలపెట్టిన ‘హాత్ సే హాత్ జోడో అభియాన్’ పై బోయిన్పల్లి గాంధీ ఐడియాలజీ సెంటర్లో మీటింగ్ జరగనుంది. మంగళవారం ఉదయం 10 నుంచి సాయంత్రం 6 గంటల వరకు ధరణి సమస్యలు, హాత్ సే హాత్ జోడో అభియాన్ ఉద్దేశం, పార్టీ ఇన్సూరెన్స్ క్లెయిమ్లు, మీడియా, సోషల్ మీడియా, ఎలక్షన్ కమిషన్ లోటుపాట్లపై ఒక రోజు శిక్షణ జరుగుతుందని కాంగ్రెస్ నేతలు తెలిపారు. ఈ శిక్షణ కార్యక్రమానికి సీనియర్ కాంగ్రెస్ నేతలందరూ హాజరు కావాలని పార్టీ అధ్యక్షుడు ఖర్గే, ఏఐసీసీ ప్రతినిధులు ఫోన్ చేసి కోరినట్లు తెలిసింది. ఇటీవల పీసీసీలోని సీనియర్ల అసంతృప్తి నేపథ్యంలో ఈ కాల్స్కు ప్రాధాన్యత ఏర్పడింది. మెజారిటీ సీనియర్లంతా ఈ మీటింగ్కు హాజరు కావాలని నిర్ణయించుకున్నట్లు సమాచారం. శిక్షణ కార్యక్రమాల తర్వాత కాంగ్రెస్ నేతలు ఆ సందేశాన్ని గడపగడపకు తీసుకెళ్లే వివిధ రకాల కార్యక్రమాలుంటాయని పీసీసీ వైస్ ప్రెసిడెంట్ చామల కిరణ్ మంగళవారం గాంధీభవన్లో తెలిపారు.
26 నుంచి పాదయాత్రలు : మహేశ్వర్ రెడ్డి
హాత్ సే హాత్ జోడో అభియాన్లో భాగంగా ఈ నెల 26 నుంచి రాష్ట్రవ్యాప్తంగా పాదయాత్రలు ఉంటా యని, వీటిని బ్లాక్ స్థాయిలో చేపడతామని ఏఐసీసీ కార్యక్రమాల అమలు కమిటీ చైర్మన్ మహేశ్వర్ రెడ్డి తెలిపారు. అన్ని సెగ్మెంట్లలో 2 నెలల పాటు కార్యక్ర మాలు సాగుతాయన్నారు. చివరి యాత్ర హైదరాబాద్లో జరుగుతుందని, దీనికి ఖర్గే లేదా రాహుల్ హాజరవుతారన్నారు. మహిళల పాదయాత్రలో ప్రియాంకా పాల్గొంటారని చెప్పారు. రేవంత్ పాదయాత్రపై, బుధవారం నాటి శిక్షణ తరగతులపై తనకు సమాచారం లేదని ఆయన తెలిపారు. రేవంత్ యాత్రకు ఏఐసీసీ అనుమతి ఇచ్చిందో లేదో తెలియదని, ఇస్తే మాత్రం ముందుండి పని చేస్తానన్నారు.
