- బస్సు, ఆటో ఎక్కి వరంగల్కు...
- పిల్లాడికి తాడు ఇచ్చి కట్టమన్న సాగర్
- ఇంటికి వచ్చాక స్టోరీ చెప్పిండు
- రేగొండలో బాలుడి కిడ్నాప్ మిస్టరీ ఛేదించిన పోలీసులు
రేగొండ, వెలుగు: జయశంకర్ భూపాలపల్లి జిల్లా రేగొండ మండల కేంద్రంలో బాలుడి కిడ్నాప్ వ్యవహారం అంతా డ్రామా అని పోలీసులు తేల్చారు. తల్లిని వదిలి హాస్టల్కు వెళ్లకుండా ఉండేందుకు చెప్పిన కట్టుకథ అని ఎస్సై ననగంటి శ్రీకాంత్రెడ్డి స్పష్టం చేశారు. రేగొండకు చెందిన కొలెపాక ప్రేమ్సాగర్సోమవారం ఉదయం పోలీస్స్టేషన్ పక్కన టిఫిన్ చేస్తుండగా కొంతమంది తనను కిడ్నాప్ చేశారని, ఓమ్ని వ్యాన్లో తీసుకువెళ్లి వరంగల్లో వదిలేశారని చెప్పిన సంగతి తెలిసిందే. అయితే ములుగు జిల్లా జాకారంలోని సోషల్ వెల్ఫేర్హాస్టల్లో 6వతరగతి చదువుతున్న ప్రేమ్సాగర్..నెల రోజుల కింద ఇంటికి వచ్చాడు. సోమవారం తల్లి హాస్టల్కు వెళ్లాలనడంతో తప్పించుకోవడానికే డ్రామా ఆడాడు.
తల్లిని వదిలి హాస్టల్కు వెళ్లలేక..
బాలుడి తల్లి సునంద కూలి పని చేస్తుంటుంది. తండ్రి లేకపోవడంతో సాగర్ను జాకారంలోని హాస్టల్లో జాయిన్ చేసింది. సోమవారం హాస్టల్ వెళ్లాలని, టిఫిన్ చేసి రమ్మని రూ.50 ఇచ్చింది. పోలీస్స్టేషన్ వరకు నడుచుకుంటూ వెళ్లి ఆర్టీసీ బస్సు ఎక్కి పరకాల వెళ్లాడు. సాగర్తో పాటు వెంకటేశ్వర్లపల్లి కి చెందిన ఐటీఐ స్టూడెంట్ రవి తేజ కూడా బస్ఎక్కాడు. ఒక్కడివే ఎక్కడికి వెళ్తున్నావ్ అని అడగ్గా..‘పరకాల హాస్పిటల్ లో తాతయ్య ఉన్నడు. అమ్మ కూడా అక్కడ్నే ఉంది. అక్కడికే వెళ్తున్నా’ అని చెప్పాడు. పరకాల నుంచి ఆటోలో వరంగల్ లోని మట్టెవాడ వెళ్లాడు. అక్క ఇంటికి వెళ్దామనుకున్నా..అడ్రస్ మర్చిపోవడంతో కొత్త కథ సృష్టించాడు. ఓ షాపులో కొబ్బరి తాడు తీసుకుని అటుగా వెళ్తున్న స్కూల్ పిల్లాడికి ఇచ్చి చేతులు వెనక్కి పెట్టి కట్టించుకున్నాడు. తర్వాత ఏడ్వడం మొదలుపెట్టాడు. ఓ వ్యక్తి బాలుడిని చూసి వివరాలు కనుక్కుని తల్లికి ఫోన్చేసి చెప్పాడు. ఇంటికి వెళ్లిన తర్వాత కిడ్నాప్ కథ చెప్పాడు. పోలీసులకు సమాచారం ఇవ్వగా కిడ్నాప్ జరిగిందన్న చోట సీసీ టీవీ ఫుటేజీలు పరిశీలించారు. అందులో పిల్లవాడు బస్కెక్కేది రికార్డయ్యింది. ఆ టైంకు ఒక్క ఓమ్నీ వ్యాన్ కూడా రాలేదు. ఎస్ఐ శ్రీకాంత్...సాగర్ను హన్మకొండకు తీసుకుని వెళ్లి ఎంక్వైరీ కూడా చేశాడు. దీంతో అన్నీ అబద్దాలే అని తేలాయి.
