- నేడు చైర్మన్పై అవిశ్వాసం
- పట్టుకోసం పాకులాడుతున్న బీఆర్ఎస్.. ‘చే’జిక్కించుకునేందుకు కాంగ్రెస్ స్కెచ్
- మీటింగ్కు భారీ బందోబస్తు ఏర్పాటు చేయాలని హైకోర్టు ఆదేశం
- 19న కొత్తగూడెం మున్సిపాల్చైర్ పర్సన్పై అవిశ్వాసం స్పెషల్ మీటింగ్
భద్రాద్రికొత్తగూడెం, వెలుగు : ఇల్లెందు, కొత్తగూడెం మున్సిపాలిటీల్లో పొలిటికల్ హై టెన్షన్ నెలకొంది. ఇల్లెందు మున్సిపల్ చైర్మన్పై సోమవారం అవిశ్వాసం స్పెషల్ మీటింగ్జరుగనుంది. చైర్మన్ దమ్మాలపాటి వెంకటేశ్వరరావుపై బీఆర్ఎస్ కౌన్సిలర్లు పెట్టిన అవిశ్వాసం రోజుకో మలుపు తిరుగుతోంది. ఏ క్షణంలో ఏ కౌన్సిలర్ ఏ గ్రూపునకు మారుతడో అర్థం కాని పరిస్థితి నెలకొంది. స్పెషల్ మీటింగ్కు భారీ బందోబస్తు ఏర్పాటు చేయాలని శనివారం హైకోర్టు సీఎస్, డీజీపీ కలెక్టర్, ఎస్పీలను ఆదేశించింది. కొత్తగూడెం మున్సిపాలిటీ చైర్ పర్సన్ కాపు సీతాలక్ష్మిపై కూడా19న అవిశ్వాసం స్పెషల్ మీటింగ్జరుగనుంది.
ఆ పార్టీల మధ్య రసవత్తరంగా రాజకీయం..
ఇల్లెందు మున్సిపాలిటీలో రాజకీయం రసవత్తరంగా మారుతోంది. బీఆర్ఎస్ తరుఫున మున్సిపల్ చైర్మన్గా ఉన్న డి. వెంకటేశ్వరరావు అసెంబ్లీ ఎన్నికలకు ముందు కాంగ్రెస్ పార్టీలో చేరారు. దీంతో చైర్మన్పై అవిశ్వాసానికి బీఆర్ఎస్ కౌన్సిలర్లు రెడీ అయ్యారు. మున్సిపాలిటీలో 24 వార్డులు ఉన్నాయి. బీఆర్ఎస్ నుంచి 19 మంది కౌన్సిలర్లు , ముగ్గురు ఇండిపెండెంట్లు, న్యూడెమొక్రసీ, సీపీఐ నుంచి ఒక్కొక్క కౌన్సిలర్ గెలుపొందారు. ఇందులో కొందరు కాంగ్రెస్ పార్టీలో చేరారు. అవిశ్వాసం సందర్భంగా బీఆర్ఎస్ పార్టీ విప్ జారీ చేసింది. పార్టీ నుంచి వెళ్లిపోయిన చైర్మన్ను గద్దె దించేందుకు బీఆర్ఎస్ నేతలు పక్కా ప్లాన్ చేస్తున్నారు.
చైర్మన్పై పెట్టిన అవిశ్వాసానికి మద్దతు ఇచ్చే ఒక్కో కౌన్సిలర్కు దాదాపు రూ. 25లక్షల వరకు ఆఫర్ ఇస్తున్నట్టుగా ప్రచారం జరుగుతోంది. ఇక కాంగ్రెస్లో చేరిన చైర్మన్ డి. వెంకటేశ్వరరావు పదవిని కాపాడేందుకు పార్టీ ముఖ్య నాయకత్వం ప్రణాళికలు రచిస్తోంది. అవిశ్వాసానికి మద్దతు తెలిపిన 14 మంది కౌన్సిలర్లు గత వారం రోజులుగా గోవా, కర్నాటక రాష్ట్రాల్లో క్యాంపుల్లో ఉన్నారు.
అవిశ్వాసం సందర్భంగా నిర్వహించనున్న స్పెషల్ మీటింగ్కు కనీసం 17 మంది కౌన్సిలర్లు అటెండ్ కావాల్సి ఉంది. ఈ క్రమంలో 17 మంది మద్దతు తమకుందని చెబుతున్న బీఆర్ఎస్ లీడర్లకు చెక్ పెట్టేందుకు కాంగ్రెస్ పావులు కదుపుతోంది. వారిలో కనీసం ఒకరిద్దరినైనా మీటింగ్కు రాకుండా చూస్తే కోరం పూర్తి కాదని, దీంతో అవిశ్వాసం నీరు గారే అవకాశం ఉండడంతో ఆ దిశగా చైర్మన్ వర్గం ఆలోచిస్తోంది.
హైకోర్టును ఆశ్రయించిన బీఆర్ఎస్ కౌన్సిలర్లు
తమను అధికార కాంగ్రెస్ పార్టీ లీడర్లు బెదిరిస్తున్నారంటూ అవిశ్వాసానికి సంతకం పెట్టిన పలువురు బీఆర్ఎస్ కౌన్సిలర్లు ఇటీవలి హైకోర్టును ఆశ్రయించారు. ఈ మేరకు విచారించిన హైకోర్టు కౌన్సిలర్లతో పాటు స్పెషల్ మీటింగ్ జరిగే ప్రాంతం వద్ద పటిష్ట బందోబస్తు ఏర్పాటు చేయాలని ఆదేశించింది. కౌన్సిలర్లకు రక్షణ కల్పించాలని హైకోర్టు సీఎస్, డీజీపీ, కలెక్టర్, ఎస్పీలకు సూచించింది.
అవిశ్వాసం నెగ్గేందుకు బీఆర్ఎస్ లీడర్లు, అవిశ్వాసం వీగేందుకు కాంగ్రెస్ లీడర్లు ఎవరికి వారు పెద్ద ఎత్తున పొలిటికల్ గేమ్ ఆడుతున్నారు. కౌన్సిలర్ల కిడ్నాప్లు జరిగే అవకాశం ఉందని పలువురు పేర్కొంటున్నారు.
కొత్తగూడెంలో హైడ్రామా షురూ..
బీఆర్ఎస్కు చెందిన కొత్తగూడెం మున్సిపల్ చైర్ పర్సన్ కాపు సీతాలక్ష్మీపై అదే పార్టీకి చెందిన కౌన్సిలర్లు పెట్టిన అవిశ్వాసంపై 19న స్పెషల్ మీటింగ్ జరగనుంది. 36 మందికి గానూ 22 మంది కౌన్సిలర్లు చైర్ పర్సన్కు వ్యతిరేకంగా అవిశ్వాసంపై సంతకాలు చేశారు. అవిశ్వాసం నెగ్గేందుకు ఒక గ్రూప్ పావులు కదుపుతుండగా వీగేందుకు చైర్ పర్సన్ గ్రూపు ఎత్తులకు పై ఎత్తులు వేస్తుండడం కొత్తగూడెంలో హై డ్రామా నెలకొంది.
