- వ్యాపారులు ఇప్పటి నుంచే రెడీ సెయిట్ సర్వేలో వెల్లడి
వెలుగు బిజినెస్ డెస్క్: ఈ ఏడాది వెడ్డింగ్ బిజినెస్ జోరు మీదున్నట్లు ఒక సర్వే వెల్లడించింది. 35 లక్షల పెండ్లిండ్ల ద్వారా మొత్తం రూ. 4.25 లక్షల కోట్ల వ్యాపారం జరుగుతుందని ఈ సర్వే రిపోర్టు అంచనా వేసింది. కాన్ఫెడరేషన్ ఆఫ్ ఆల్ ఇండియా ట్రేడర్స్ (సెయిట్)కి చెందిన రీసెర్చ్ సంస్థ పై సర్వేను నిర్వహించింది. నవంబర్23 న మొదలై డిసెంబర్ 15 దాకా కొనసాగే వెడ్డింగ్ సీజన్ కోసం ట్రేడర్లు ఉత్సాహంతో ఎదురు చూస్తున్నారు.
ఒక్క ఢిల్లీలోనే 3.5 లక్షల వెడ్డింగ్స్ చోటు చేసుకోనున్నాయని, దీని ద్వారా లక్ష కోట్ల వ్యాపారం జరుగుతుందని అంచనా. కిందటేడాది దేశంలో 32 లక్షల పెండ్లిండ్లు జరిగాయి. అప్పట్లో రూ. 3.75 లక్షల కోట్ల బిజినెస్ జరిగిందని సెయిట్ నేషనల్ ప్రెసిడెంట్ బీ సీ భర్తియా వెల్లడించారు. 23 రోజులపాటు సాగే వెడ్డింగ్ సీజన్లో 6 లక్షల పెండ్లిండ్లలో ఒక్కో పెండ్లికీ రూ. 3 లక్షలు, 10 లక్షల పెండ్లిండ్లలో ఒక్కో పెండ్లికీ రూ. 6 లక్షలు చొప్పున బిజినెస్ జరుగుతుందని సెయిట్ సెక్రటరీ జనరల్ ప్రవీణ్ ఖండేల్వాల్ చెప్పారు.
మరో 12 లక్షల పెండ్లిండ్లలో ఒక్కో పెండ్లికీ ఖర్చు రూ. 10 లక్షల దాకా ఉంటుందని, ఇంకో 6 లక్షల పెండ్లిండ్లలో ఒక్కో పెండ్లికీ ఖర్చు రూ. 25 లక్షల దాకా ఉండొచ్చని పేర్కొన్నారు. 50 వేల వెడ్డింగ్స్లో ఒక్కో వెడ్డింగ్కు రూ. 50 లక్షలు, మరో 50 వేల పెండ్లిండ్లలో ఒక్కో పెండ్లికీ రూ. కోటికి మించి ఖర్చు పెడతారని ఆయన అంచనా వేశారు. వెడ్డింగ్ సీజన్లో భారీ బిజినెస్ సాధించేందుకు ట్రేడర్లు అన్ని విధాల రెడీ అవుతున్నారని భర్తియా వివరించారు.
కస్టమర్ల రద్దీని తట్టుకునేందుకు సరైన ప్లానింగ్తో వారు ముందుకొస్తున్నట్లు చెప్పారు. బాంకెట్ హాల్స్, హోటల్స్, ఓపెన్ లాన్స్, కమ్యూనిటీ సెంటర్స్, పబ్లిక్ పార్క్స్, ఫార్మ్ హౌస్లు వంటివన్నీ తాజా పెండ్లిండ్ల సీజన్కోసం సిద్ధమవుతున్నట్లు ఖండేల్వాల్ పేర్కొన్నారు. టెంట్ డెకొరేటర్లు, ఫ్లవర్ డెకొరేషన్స్, క్రోకరీ, కేటరింగ్ సర్వీస్, ట్రావెల్ సర్వీస్, క్యాబ్ సర్వీస్, వెల్కమింగ్ ప్రొఫెషనల్ గ్రూప్స్, వెజిటబుల్ వెండర్స్, ఫొటోగ్రాఫర్స్, వీడియో గ్రాఫర్స్, బ్యాండ్–బాజా, షెహనాయ్, ఆర్కెస్ట్రా, డీజే, ఊరేగింపుల కోసం గుర్రాలు, వ్యాగన్లు, లైట్స్ వంటి అనేక సర్వీసులకు కూడా ఫుల్లు గిరాకీ ఉంటుందని ఆయన వివరించారు.
