భరూచ్: గుజరాత్‌‌లో ఘోర ప్రమాదం చోటుచేసుకుంది. ఆగి ఉన్న ట్రక్కును ప్యాసింజర్లతో వెళ్తున్న వ్యాన్ ఢీకొట్టింది. ఈ ప్రమాదంలో ముగ్గురు చిన్నారులు సహా ఆరుగురు వ్యక్తులు అక్కడికక్కడే మరణించారు. మరో నలుగురు గాయాలపాలయ్యారు. సోమవారం రాత్రి 11 గంటల సమయంలో బరూచ్ జిల్లా మగ్నాడ్ గ్రామ సమీపంలో జంబూసర్ -అమోద్ రహదారిపై ఈ ఘటన చోటుచేసుకుంది. వేదచ్ గ్రామం నుంచి పది మంది వ్యక్తులు ప్రైవేట్ వ్యాన్లో శుక్లతీర్థం వైపు వెళ్తుండగా ఈ యాక్సిడెంట్జరిగినట్టు పోలీసులు తెలిపారు. ప్యాసింజర్ వ్యాన్ మాగ్నాడ్ గ్రామ సమీపంలో రహదారిపై ఆగి ఉన్న ట్రక్కును ఢీకొట్టిందన్నారు. గాయపడిన వారిని జంబూసర్‌‌లోని ఆస్పత్రికి తరలించినట్టు తెలిపారు. ట్రక్కు డ్రైవర్పై కేసు నమోదు చేసినట్టు తెలిపారు. అయితే, అప్పటికే డ్రైవర్ పారిపోయాడని, అతని కోసం గాలిస్తున్నామని చెప్పారు.
