- క్యాంప్కు తరలిన 8 మంది బీఆర్ఎస్ కౌన్సిలర్లు
- అవిశ్వాసానికి పరోక్షంగా మద్దతిచ్చేందుకేనంటూ చర్చ
- ఇప్పటికే సపరేట్ క్యాంప్లో ఉన్న 27 మంది కాంగ్రెస్ కౌన్సిలర్లు
కామారెడ్డి, వెలుగు : కామారెడ్డి మున్సిపల్ పాలిటిక్స్ రోజుకో మలుపు తిరుగుతోంది. చైర్పర్సన్ నిట్టు జాహ్నవిపై అవిశ్వాస నోటీసు ఇచ్చిన కాంగ్రెస్ కౌన్సిలర్లు క్యాంప్కు వెళ్లగా, తాజాగా బీఆర్ఎస్కు చెందిన ఎనిమిది మంది కౌన్సిలర్లు సపరేట్గా క్యాంప్కు తరలివెళ్లారు. 27 మంది కాంగ్రెస్ కౌన్సిలర్లు ఈ నెల 11న అవిశ్వాసం కోరుతూ కలెక్టర్కు నోటీసు ఇచ్చారు. అదే రోజు క్యాంప్కు వెళ్లారు.
అవిశ్వాస మీటింగ్ జరగాలంటే 35 మంది కౌన్సిలర్లు సమావేశానికి అటెండ్ కావాల్సి ఉంది. ఈ నేపథ్యంలో బీఆర్ఎస్కు చెందిన ఎనిమిది మంది కౌన్సిలర్లు సపరేట్గా క్యాంప్ కు వెళ్లడం చర్చనీయాంశమైంది. కాంగ్రెస్ పార్టీలో చేరకుండానే అవిశ్వాస మీటింగ్కు హాజరయ్యేందుకు వీరు క్యాంప్కు వెళ్లారని స్థానికంగా ప్రచారం జరుగుతోంది.
పరోక్షంగా మద్దతిచ్చేందుకు!
27 మంది కౌన్సిలర్ల మద్దతు ఉన్న కాంగ్రెస్ పార్టీ నేతలు కోరం కోసం ప్రయత్నిస్తున్నారు. బీఆర్ఎస్కు చెందిన కొందరు కౌన్సిలర్లు పార్టీ మారకుండానే పరోక్షంగా అవిశ్వాసానికి మద్దతు తెలిపేందుకే క్యాంప్కు వెళ్లినట్లు రాజకీయ వర్గాల్లో చర్చ నడుస్తోంది.
మంగళవారం స్థానికంగా సమావేశమైన 8 మంది కౌన్సిలర్లు అవిశ్వాసంపై చర్చించారు. ఆ తర్వాత హైదరాబాద్కు వెళ్లి అక్కడి నుంచి గోవాకు తరలారు. చైర్పర్సన్తో పాటు 8 మంది బీఆర్ఎస్ కౌన్సిలర్లు స్థానికంగానే ఉన్నారు. అవిశ్వాసం వీగిపోయేందుకు శతవిధాల ప్రయత్నాలు చేస్తున్నారు.
