లక్నో: మృత్యువు ఏ రూపంలో వస్తుందో తెలియదు. మనం ఎంత జాగ్రత్తగా ఉన్న టైమ్ వస్తే మరణం నుంచి తప్పించుకోలేం. మనం ఎంత జాగ్రత్తగా ఉన్న కొందరు చేసే పొరపాట్ల వల్ల ప్రాణాలు కోల్పోవచ్చు. ఇలాంటి ఘటనే ఒకటి ఉత్తర ప్రదేశ్లో జరిగింది. పెళ్లి ఊరేగింపు వేడుకల్లో జరిపిన కాల్పుల్లో రెండున్నర సంవత్సరాల బాలుడు మృతి చెందాడు. అధికారుల వివరాల ప్రకారం.. నోయిడాలోని సెక్టార్ 49 పోలీస్ స్టేషన్ పరిధి అఘాపూర్ గ్రామంలో ఆదివారం రాత్రి ఓ పెళ్లి ఊరేగింపు జరిగింది. డీజే, బ్యాండ్, లైటింగ్తో దూమ్ ధామ్గా బరాత్ నిర్వహిస్తుండటంతో స్థానికులు ఆసక్తిగా ఈ వేడుకను తిలకించారు.
కొందరు రోడ్డుపైకి వచ్చి ఊరేగింపు చూడగా.. మరికొందరు ఇంటి బాల్కనీల పై నుంచి బరాత్ను చూస్తున్నారు. ఈ క్రమంలో అత్యుత్సాహం ప్రదర్శించిన పెళ్లి కొడుకు ఫ్రెండ్ ఒకరు గాల్లోకి కాల్పులు జరిపారు. దురదృష్టవశాత్తూ బుల్లెట్ బాల్కనీ నుంచి ఊరేగింపు చూస్తోన్న ఓ రెండున్నరేళ్ల బాలుడి తలలో నుంచి దూసుకుపోయింది. వెంటనే అప్రమత్తమైన కుటుంబ సభ్యులు హుటాహుటిన బాలున్ని ఆసుపత్రికి తరలించారు.
ALSO READ | ఫ్యామిలీని ఇలా కూడా చంపుతారా: మైసూర్ వ్యాపారవేత్త హత్యలు, ఆత్మహత్య సంచలనం
అయితే.. అప్పటికే బాలుడు మృతి చెందాడని వైద్యులు నిర్ధారించారు. ఇదంతా పెళ్లి ఊరేగింపును వీడియో తీస్తోన్న ఓ వ్యక్తి ఫోన్లో రికార్డ్ అయ్యింది. మృతుడి తల్లిదండ్రుల ఫిర్యాదు మేరకు బరాత్లో కాల్పులు జరిపిన యువకుడిపై కేసు నమోదు చేశామని పోలీసులు తెలిపారు. బాలుడి తల్లిదండ్రులు కాల్పులు జరిపిన వ్యక్తి ఇంటిపై దాడి చేసే అవకాశం ఉండటంతో ఎలాంటి అవాంఛనీయ ఘటనలు చేసుకోకుండా భద్రతను పెంచినట్లు పేర్కొనారు.
