- కండక్టర్పై పాము విసిరిన మహిళ
- బస్సు ఆపలేదని బీర్ బాటిల్‌‌‌‌‌‌‌‌తో దాడి
- హైదరాబాద్ నల్లకుంటలో ఘటన
ముషీరాబాద్, వెలుగు: బస్సు ఆపనందుకు ఓ మహిళ బస్సు అద్దం పగలగొట్టి, కండక్టర్పై పాము విసిరిన ఘటన హైదరాబాద్‌‌‌‌‌‌‌‌లోని నల్లకుంటలో చోటుచేసుకుంది. దిల్‌‌‌‌‌‌‌‌సుఖ్‌‌‌‌‌‌‌‌నగర్‌ డిపోకు చెందిన బస్సు విద్యానగర్ సిగ్నల్ మూల మలుపు వద్ద రద్దీగా ఉన్న ప్రాంతంలో ఫాతిమా బేగం (60) బస్సును ఆపేందుకు ప్రయత్నించింది. డ్రైవర్ ఆపకుండా ముందుకెళ్లడంతో ఆగ్రహించిన ఫాతిమా.. బస్సుపైకి బీర్ బాటిల్‌ విసరడంతో వెనుక అద్దం పగిలిపోయింది.
గమనించిన డ్రైవర్, కండక్టర్, ప్రయాణికులు బస్సు దిగి ఆమెను పట్టుకునే ప్రయత్నించగా, వెంటనే ఆమె తన బ్యాగులో ఉన్న పామును తీసి కండక్టర్ స్వప్నపై విసిరింది. దీంతో కంగుతిన్న డ్రైవర్, ప్రయాణికులు పరుగులు తీశారు. పాము నడిరోడ్డుపై డివైడర్లను దాటుకుంటూ అక్కడి నుంచి వెళ్లిపోయింది. స్థానికులు నల్లకుంట పోలీస్ స్టేషన్‌‌‌‌‌‌‌‌కు సమాచారం ఇవ్వడంతో పోలీసులు ఘటనా స్థలానికి చేరుకొని ఫాతిమా బేగంను అదుపులోకి తీసుకున్నారు. బస్సు డ్రైవర్ రామకృష్ణ ఫిర్యాదు మేరకు కేసు నమోదు చేసుకొని, దర్యాప్తు చేస్తున్నామని పోలీసులు తెలిపారు.
