- శంషాబాద్ ఎయిర్పోర్టులో మహిళల నుంచి స్వాధీనం
శంషాబాద్, వెలుగు: శంషాబాద్ ఎయిర్పోర్టులో ఇద్దరు మహిళల వద్ద నుంచి విషపూరితమైన పాములు స్వాధీనం చేసుకున్నారు. ఈ మేరకు వాళ్లను కస్టమ్స్ అధికారులు అదుపులోకి తీసుకుని ప్రశ్నిస్తున్నారు. సోమవారం తెల్లవారుజామున బ్యాంకాక్ నుంచి ఇద్దరు మహిళలు శంషాబాద్ కు చేరుకున్నారు. కస్టమ్స్ అధికారులకు వీరిపై అనుమానం వచ్చింది.
వారిదగ్గర ఉన్న బ్యాగులను చెక్ చేశారు. వాటిలో కొన్ని బాక్సులు గుర్తించారు. తెరిచి చూడగా.. విషపూరితమైన రెండు పాములు కన్పించాయి. వెంటనే ఇద్దరు మహిళలను అదుపులోకి తీసుకున్నారు. బ్యాంకాక్ ఎయిర్పోర్టులో అధికారులు సరిగా తనిఖీలు చేయకపోవడంతోనే హైదరాబాద్కు తీసుకొచ్చారని కస్టమ్స్ ఆఫీసర్లు తెలిపారు. అయితే, పాములను హైదరాబాద్కు ఎందుకు తీసుకొచ్చారనే దానిపై ఆరా తీస్తున్నారు. ఇక ముందు ఎప్పుడైనా తీసుకొచ్చారా? అనే దానిపై కూడా వారిని ఎంక్వైరీ చేస్తున్నారు.
