కోల్బెల్ట్,వెలుగు : మంచిర్యాల జిల్లా కాసిపేట మండలం మామిడిగూడ గ్రామానికి చెందిన లౌడియా సాగర్(22) అనే యువకుడిని గుర్తుతెలియని వ్యక్తులు శుక్రవారం రాత్రి మందమర్రిలో హత్య చేశారు. మందమర్రి సీఐ మహేందర్రెడ్డి, ఎస్సై చంద్రకుమార్, కుటుంబసభ్యులు తెలిపిన వివరాల ప్రకారం... కొద్దిరోజులుగా సాగర్ లారీ క్లీనర్గా పనిచేస్తున్నాడు. శుక్రవారం సాయంత్రం జీతం డబ్బుల కోసం మందమర్రిలోని లారీ ఓనర్ వద్దకు వెళ్తున్నట్లు ఇంట్లో చెప్పి బయటకు వెళ్లాడు.
అదే రోజు రాత్రి మందమర్రిలో గుర్తుతెలియని నలుగురు యువకులు సాగర్తో గొడవపడి తీవ్రంగా కొట్టి శనివారం తెల్లవారుజామున 2 గంటల ప్రాంతంలో యాక్సిడెంట్లో గాయపడ్డాడని మంచిర్యాల ప్రభుత్వ దవాఖానాలో చేర్చి వెళ్లిపోయారు. ఆ తర్వాత కొద్దిసేపటికే సాగర్ చనిపోయాడు. ఈ విషయాన్ని పోలీసులు అతడి కుటుంబసభ్యులకు తెలిపారు. శనివారం పొద్దున మృతుడి కుటుంబసభ్యులు హాస్పిటల్కు చేరుకొని సాగర్ను హత్య చేసిన నిందితులపై చర్య తీసుకోవాలని డిమాండ్ చేస్తూ ధర్నాకు దిగారు.
పోలీసుల అదుపులో నిందితులు
సాగర్ తండ్రి తారాచంద్ ఇచ్చిన ఫిర్యాదుతో మేరకు కేసు నమోదు చేసి దర్యాప్తు చేస్తున్నారు. సాగర్ కొద్దిరోజుల కిందటి వరకు మందమర్రి రైల్వే స్టేషన్ రోడ్ ప్రాంతంలోని వాటర్ ప్లాంట్లో పనిచేసి మానేశాడు. ప్రస్తుతం లారీపై క్లీనర్గా పనిచేస్తున్నాడు. పనిచేసిన చోట ఒక యువతితో కొనసాగిన ప్రేమ వ్యవహారం కారణంగానే శుక్రవారం రాత్రి సాగర్ను నిందితులు పట్టుకొని తీవ్రంగా కొట్టి చంపి ఉంటారనే పోలీసులు ఎంక్వయిరీ చేస్తున్నట్లు తెలుస్తోంది. ఇప్పటికే నలుగురు యువకులను మందమర్రి పోలీసులు ఆదుపులోకి తీసుకున్నట్లు సమాచారం.
