- వనపర్తి జిల్లా పెబ్బేరులో ఘటన
పెబ్బేరు, వెలుగు : వనపర్తి జిల్లా పెబ్బేరులో బట్టలుతకడానికి కాలువకు వెళ్లగా, అందులోకి జారిపడి ఓ యువతి గల్లంతైంది. పెబ్బేరు పోలీసుల కథనం ప్రకారం..షేక్ సఖినాబీ(25), సూర్యాపేట జిల్లా యల్లాపురం గ్రామానికి చెందిన షేక్మహమూద్ భార్యాభర్తలు. ఇద్దరూ పెబ్బేరులోని వినాయకనగర్కాలనీలో ఉంటూ ఇండ్ల నిర్మాణ పనులు చేస్తూ బతుకుతున్నారు.
సోమవారం సాయంత్రం 4 గంటలకు సఖినాబీ..కాలనీలోని నలుగురు మహిళలతో కలిసి ఆటోలో వనపర్తి వెళ్లే దారిలో ఉన్న కాలువకు బట్టలుతకడానికి వెళ్లింది. ఈ క్రమంలోనే కాలు జారి కాలువలో పడిపోయింది. పక్కనున్న మహిళలు ఆమెను కాపాడటానికి ప్రయత్నించినా నీటి ప్రవాహం ఎక్కువగా ఉండడంతో సాధ్యం కాలేదు. పోలీసులకు సమాచారమివ్వగా వారు నీటి సరఫరా ఆపివేయాలంటూ ఇరిగేషన్ శాఖ ఆఫీసర్లకు సమాచారమిచ్చారు. తర్వాత గాలింపు చర్యలు మొదలుపెట్టారు. కేసు నమోదు చేసుకుంటామని ఎస్సై జగదీశ్వర్ రెడ్డి తెలిపారు.
