మహారాష్ట్ర అసెంబ్లీ ఎన్నికల వేళ కేజ్రీవాల్ సంచలన నిర్ణయం

మహారాష్ట్ర అసెంబ్లీ ఎన్నికల వేళ మరో కీలక పరిణామం చోటు చేసుకుంది. నవంబర్‎లో జరగనున్న మహారాష్ట్ర అసెంబ్లీ ఎన్నికల్లో పోటీ చేయొద్దని ఆమ్ ఆద్మీ పార్టీ (ఆప్) నిర్ణయం తీసుకుంది. పోటీకి దూరంగా ఉండనున్న ఆప్.. ఇండియా కూటమికి మద్దతు ప్రకటించింది. ఈ మేరకు శనివారం ఆప్ ఈ విషయాన్ని అధికారికంగా వెల్లడించింది. మహారాష్ట్ర అసెంబ్లీ ఎన్నికల్లో ఆప్ పోటీ చేయడం లేదు. ఆప్ కన్వీనర్ అరవింద్ కేజ్రీవాల్ మహా వికాస్ అఘాడీ కూటమి తరుఫున ప్రచారం చేస్తారు’’ అని ఆప్ తెలిపింది. ఆప్‌ కేడర్ ఉన్న స్థానాలతో పాటు, ఎంవీఏ కూటమి అభ్యర్థులకు వివాదాస్పద నేపథ్యం లేని అసెంబ్లీ స్థానాల్లో కేజ్రీవాల్ క్యాంపెయినింగ్ చేస్తారని పేర్కొంది.

మహా వికాస్ అఘాడీ కూటమి విజ్ఞప్తి మేరకు ఈ నిర్ణయం తీసుకున్నట్లు ఆప్ స్పష్టం చేసింది. కేజ్రీవాల్ తో పాటు ఆమ్ ఆద్మీకి చెందిన మరి కొందరు సీనియర్ నేతలు సైతం ఇండియా కూటమి అభ్యర్థుల కోసం ప్రచారం చేయనున్నట్లు ఆ పార్టీ వెల్లడించింది. జార్ఖండ్ అసెంబ్లీ ఎన్నికల్లోనూ ఆప్ పోటీకి దూరంగా ఉండి.. ఇండియా కూటమికి మద్దతు ఇవ్వనున్నట్లు సమాచారం. ఇండియా కూటమిలో భాగస్వామ్యపక్షాలైన ఆప్, కాంగ్రెస్ ఇటీవల జరిగిన హర్యానా, జమ్మూ కాశ్మీర్ అసెంబ్లీ ఎన్నికల్లో వేర్వేరుగా బరిలోకి దిగిన విషయం తెలిసిందే. ఈ నిర్ణయం రెండు పార్టీలను భారీగా దెబ్బతీశాయి.

హర్యానాలో తప్పక గెలుస్తుందనుకున్న కాంగ్రెస్ ఆప్ ఓట్ల చీలిక కారణంగా విజయం ముంగిట బోల్తా పడి మూడోసారి ప్రతిపక్షానికి పరిమితమయ్యింది. ఈ అనుభవాన్ని దృష్టిలో పెట్టుకున్న ఇరు పార్టీలు.. బీజేపీ నేతృత్వంలోని ఎన్డీఏ కూటమిని ఓడించడమే లక్ష్యంగా ఈ సారి వ్యూహాత్మకంగా అడుగులు వేస్తున్నాయి. కాగా, మహారాష్ట్ర అసెంబ్లీ ఎన్నికలు నవంబర్ 20న జరగనున్నాయి. మొత్తం 288 నియోజకవర్గాలకు సింగిల్ ఫేజ్‎లో పోలింగ్ జరగనుంది. నవంబర్ 23న ఓట్ల లెక్కింపు, ఫలితాలు వెలువడనున్నాయి.