మహిళలకు అభయం.. రామగుండం కమిషనరేట్​లో అభయ్​ యాప్​ ప్రారంభం

• ముందుగా ఆటోలు, తర్వాత ఇతర వెహికల్స్​లో ఏర్పాటు 
• క్యూఆర్​ కోడ్​ స్కాన్​ చేస్తే లైవ్​లొకేషన్ వివరాలు ప్రత్యక్షం
• సంఘటనా స్థలానికి చేరుకొని రక్షణ కల్పించనున్న పోలీసులు

మంచిర్యాల, వెలుగు:  ఆటోలు, ట్యాక్సీల్లో ప్రయాణించే మహిళలతో పాటు ప్రయాణికుల భద్రత కోసం రామగుండం పోలీస్ కమిషరేట్​పరిధిలో ప్రత్యేక చర్యలు తీసుకుంటున్నారు. ఇందులో భాగంగా  ప్రభుత్వం గతంలో రూపొందించిన అభయ్(సేఫ్​ఆటో) మొబైల్​ యాప్​ను పకడ్బందీగా అమలు చేస్తున్నారు. పోలీస్ ​కమిషనర్ రెమా రాజేశ్వరి ఇటీవలే రామగుండంలోని కమిషనరేట్​లో ఈ యాప్​ను ప్రారంభించారు. ముందుగా ఆటోలు, తర్వాత కార్లు, ఇతర ప్రైవేట్​వెహికల్స్​లో దీనిని ఏర్పాటు చేస్తున్నారు. ఈ యాప్​లో ఆటోలు, డ్రైవర్లకు సంబంధించిన పూర్తి వివరాలను నిక్షిప్తం చేస్తారు. ఈ యాప్ పోలీస్​కమాండ్​కంట్రోల్​ సెంటర్​తో పాటు పోలీస్ ​స్టేషన్లకు లింక్​చేసి ఉంటుంది. దీంతో మహిళలపై జరిగే అఘాయిత్యాలను ముందుగానే గుర్తించి నివారించవచ్చని పేర్కొంటున్నారు. 

క్యూఆర్​ కోడ్ స్కాన్​ చేస్తే చాలు

అభయ్​(సేఫ్​ఆటో) యాప్​ క్యూఆర్​ కోడ్ ​విధానంలో పనిచేస్తుంది. యూనిక్​ నంబర్​తో కూడిన క్యూఆర్​కోడ్ ను డ్రైవర్​ సీటు వెనుక ప్రయాణికులకు కనిపించే విధంగా ఏర్పాటు చేస్తున్నారు. కమిషనరేట్​పరిధిలో 5వేలకు పైగా ఆటోలు ఉండగా, ఇప్పటికే 4500లకు పైగా ఆటోల్లో ఈ క్యూఆర్​ కోడ్​ను ఏర్పాటు చేశారు. మహిళలు, ప్రయాణికులతో ఆటో డ్రైవర్లు అనుచితంగా ప్రవర్తించినా, దురుద్దేశంతో ఆటోను దారిమళ్లించినా, స్పీడ్, ర్యాష్​ డ్రైవింగ్​ చేసినా లేదా తాము మరేదైనా ప్రమాదంలో ఉన్నట్లు భావించినా ఈ యాప్​ద్వారా పోలీసుల తక్షణ సహాయం పొందవచ్చు. అందుకే స్మార్ట్​ఫోన్​లో ఈ అభయ్​ యాప్​ను డౌన్​లోడ్​ చేసుకోవాలని పోలీసులు కోరుతున్నారు. ఎమర్జెన్సీ టైమ్​లో క్యూఆర్​ కోడ్​ను స్కాన్ చేస్తే సదరు కంప్లైంట్​కమాండ్ కంట్రోల్ సెంటర్​కు చేరుతుంది. ఆపై సంబంధిత పోలీస్​ స్టేషన్​కు సమాచారం వెళ్లి, వెంటనే ఆటో లైవ్​ లొకేషన్​ తెలిసిపోతుంది. ఈ యాప్​లో ఎమర్జెన్సీ కాల్స్, ఎస్​ఎంఎస్, లొకేషన్​ట్రేసింగ్, ఎమర్జెన్సీ కంప్లైంట్స్​వంటి ఆప్షన్స్​ఉన్నాయి. 

మహిళలకు పూర్తి భద్రత

మహిళలు, ఉద్యోగులు, విద్యార్థినులు నిత్యం ఆటోల్లోనే ఎక్కువగా ప్రయాణాలు చేస్తుంటారు. మహిళా ఉద్యోగులైతే పగటిపూట మాత్రమే కాకుండా రాత్రి వేళల్లో కూడా ఒంటరిగా ఆటోల్లో ట్రావెల్ ​చేయాల్సిన పరిస్థితులుంటాయి. ఇదే అదునుగా ఈ మధ్య కాలంలో మహిళలపై ఆటో డ్రైవర్ల ఆగడాలు పెరుగుతున్నాయి. ఒంటరిగా ప్రయాణిస్తున్నప్పుడు వారి అసహాయతను ఆసరాగా చేసుకొని వేధింపులకు పాల్పడుతున్నారు. ఇవే కాక మద్యం మత్తులో స్పీడ్​గా, ర్యాష్​ డ్రైవింగ్ చేసి యాక్సిడెంట్లకు కారణమవుతున్నారు. ఇటువంటి పరిస్థితుల్లో స్మార్ట్​ ఫోన్​లో క్యూఆర్ కోడ్​ను స్కాన్​చేస్తే లైవ్​ లొకేషన్​ వివరాలు కమాండ్​ కంట్రోల్​సెంటర్​కు చేరుతాయి. వెంటనే పోలీసులు అక్కడికి చేరుకొని మహిళలు, ప్రయాణికులను రక్షించడంతో పాటు ఆకతాయిల ఆటకట్టించేందుకు అవకాశం ఉంటుంది.

ప్రతి ఒక్కరు ఇన్​స్టాల్​చేసుకోవాలి

ఆటోల్లో వెళ్లే  ప్రయాణికుల భద్రత కోసం అభయ్​(సేఫ్​ ఆటో) యాప్​ఎంతో దోహదపడుతుంది. ముఖ్యంగా మహిళలకు ఈ యాప్ ​రక్షణ కల్పిస్తుంది. ప్రమాదాన్ని పసిగట్టి క్యూఆర్ ​కోడ్​ను స్కాన్​ చేస్తే పోలీసులు వెంటనే  అక్కడికి చేరుకొని రక్షణ కల్పిస్తారు. ప్రతి ఒక్కరూ ఈ యాప్​ను 
ఇన్​స్టాల్​ చేసుకోవాలి.

రెమా రాజేశ్వరి, పోలీస్ కమిషనర్