హైదరాబాద్: తెలంగాణ పాలిటిక్స్లో హాట్ టాపిక్గా మారిన ఫార్ములా ఈ కార్ రేస్ కేసులో ఏసీబీ దూకుడు పెంచింది. ప్రభుత్వం ఈ కేసును సీరియస్గా తీసుకోవడంతో ఏసీబీ దర్యాప్తు స్పీడప్ చేసింది. ఈ క్రమంలోనే ఫార్ములా ఈ కార్ రేస్ వ్యవహారంలో అవకతవకలు జరిగినట్లు ఫిర్యాదు చేసిన ఐఏఎస్ అధికారి దాన కిశోర్ స్టేట్మెంట్ను ఏసీబీ రికార్డ్ చేసింది.
దాన కిశోర్ను దాదాపు 7 గంటల పాటు సుధీర్ఘంగా విచారించిన అధికారులు ఆయన వాంగూల్మం రికార్డ్ చేశారు. ఈ కేసుకు సంబంధించిన పత్రాలను దాన కిశోర్ దగ్గరి నుండి స్వాధీనం చేసుకున్నారు. దాన కిశోర్ స్టేట్మెంట్ ఆధారంగా ఈ కేసులో ప్రధాన నిందితులుగా ఉన్న మాజీ మంత్రి కేటీఆర్, ఐఏఎస్ అధికారి అరవింద్ కుమార్కు నోటీసులు ఇచ్చేందుకు ఏసీబీ సిద్ధం అవుతోన్నట్లు తెలుస్తోంది.
గత బీఆర్ఎస్ ప్రభుత్వం రాష్ట్ర రాజధాని హైదరాబాద్ నడిబొడ్డు హూస్సేన్ సాగర్ తీరాన ఫార్ములా ఈ కార్ రేసింగ్ నిర్వహించిన విషయం తెలిసిందే. అయితే, ఫార్ములా ఈ కార్ రేసింగ్ వ్యవహారంలో అవకతకలు జరిగినట్లు ఆరోపణలు వెల్లువెత్తాయి. కేబినెట్ ఆమోదం లేకుండా సెక్రటేరియట్ బిజినెస్ రూల్స్కు విరుద్ధంగా అప్పటి మున్సిపల్, ఐటీ మంత్రి కేటీఆర్ నోటి మాట మేరకు హెచ్ఎండీఏ కార్ రేసింగ్ నిర్వహణ సంస్థకు రూ.55 కోట్లు ట్రాన్స్ ఫర్ చేసినట్లు ఆరోపణలు ఉన్నాయి.
ఏదైనా విదేశీ సంస్థకు ప్రభుత్వం డబ్బు ట్రాన్స్ఫర్ చేయాలంటే ఆర్బీఐ అనుమతి తప్పనిసరి. కానీ అప్పటి ప్రభుత్వం నిబంధనలకు విరుద్ధంగా విదేశీ కంపెనీకి రూ.55 కోట్లు ట్రాన్స్ఫర్ చేసినట్లు తేలడంతో ప్రభుత్వం విచారణకు ఆదేశించింది. ఈ మేరకు ఫార్ములా ఈ కార్ రేస్ రేసింగ్ పై ఏసీబీ కేసు నమోదు చేసింది. అప్పటి మంత్రి కేటీఆర్ ఏ1, ఐఏఎస్ అధికారి అరవింద్ కుమార్ను ఏ2 నిందితులుగా చేర్చి విచారణలో దూకుడు పెంచింది.
మరోవైపు ఫార్మూలా ఈ కార్ రేసింగ్ వ్యవహరంలో తనపై నమోదైన కేసును కేటీఆర్ హై కోర్టులో సవాల్ చేశారు. దీంతో 2024, డిసెంబర్ 30వ తేదీ వరకు కేటీఆర్ ను అరెస్ట్ చేయొద్దని హై కోర్టు మధ్యంతర ఉత్తర్వులు జారీ చేసింది. ఈ క్రమంలో కేటీఆర్ కు ఏసీబీ నోటీసులు ఇచ్చేందుకు సిద్ధం కావడంతో కార్ రేసింగ్ కేసులో నెక్ట్స్ ఏం జరగబోతుందనే దానిపై ఉత్కంఠ నెలకొంది.
