- 10 కేసులు నమోదు.. ఇద్దరికి జైలు
- అవినీతిలేని పౌర సేవలు పొందేలా కొత్త ఏడాదిలో పక్కా ప్లాన్తో ముందుకు
- ప్రజలలో విస్తృత ప్రచారానికి ప్లాన్
నిజామాబాద్, వెలుగు:నిజామాబాద్ నగర పాలక సంస్థ రెవెన్యూ ఆఫీసర్ (ఆర్వో) దాసరి నరేందర్ ఇంటిపై 2024 ఆగస్టు 9న నిర్వహించిన రైడ్లో రూ.2.93 కోట్ల నగదుతో పాటు మార్కెట్ విలువ ప్రకారం స్వాధీనం చేసుకున్న సుమారు రూ.25 కోట్ల విలువైన ప్రాపర్టీ సీజ్ చేశారు. దాడి సమాచారం లీక్ కాకుండా జాగ్రత్తలు తీసుకొని సక్సెస్ అయ్యారు. ఈ ఒక్కదాడి తరువాత మున్సిపల్ కార్పొరేషన్ పాలనలో చాలా మార్పులు జరిగాయి.
మరికొన్ని దాడుల్లో
జనవరి 8న కామారెడ్డి సబ్స్టేషన్లో సంతోష్ అనే వ్యక్తి అద్దెకు పెట్టిన వెహికల్ బిల్లు శాంక్షన్ చేయడానికి ఏఈ సాయినిరాజు రూ.12.500 లంచం డిమాండ్ చేసి రెడ్హ్యాండెడ్గా చిక్కాడు.
ఫిబ్రవరి 5న జక్రాన్పల్లి మండలం తొర్లికొండ వాసి నిఖిల్కు ఇంటి ఓనర్ షిప్ సర్టిఫికేట్ఇవ్వడానికి రూ.4 వేలు లంచంగా తీసుకుంటూ గ్రామ పంచాయతీ సెక్రటరీ మనోహర్ ఏసీబీకి దొరికి జైలుకు వెళ్లాడు.
మార్చి 26న కమ్మర్పల్లి మండల పరిషత్ ఆఫీస్ ఉద్యోగి రావుట్ల బాగయ్య సర్వీస్ బుక్ సవరించడానికి ఎంపీడీవో సంతోష్రెడ్డి తరపున రూ.8 వేల లంచం తీసుకుంటూ సీనియర్ అసిస్టెంట్ హరిబాబు పట్టుబడగా ఇద్దరిపై కేసు నమోదుకావడంతో జైలు శిక్షపడింది.
ఏప్రిల్30న ఆర్మూర్ కోర్టులో ఒక కేసుకు సంబంధించి సెల్ఫోన్ రిటర్న్ చేయడానికి వెంకటేశ్వర్ అనే ఉద్యోగి రూ.4 వేలు డిమాండ్ చేయగా ఏసీబీ ఆఫీసర్లు కేసు నమోదు చేశారు.
మే 28న బోధన్ మండలం సాలూరా ఇంటిగ్రేటెడ్ చెక్పోస్ట్పై ఆకస్మిక దాడి చేసి క్యాష్బుక్లో ఎంటర్ చేసినదానికంటే ఎక్కువ నగదు కలిగి ఉన్న కంప్యూటర్ ఆపరేటర్ చైత్రిస్వామిపై ప్రభుత్వానికి రిపోర్ట్ చేశారు.
ఆగస్టు 13న నగరంలోని కోటగల్లీ ఎస్సీ గర్ల్స్ హాస్టల్పై సడన్ రైడ్ చేసి నిర్వహణ లోపాలపై సర్కారుకు నివేదిక పంపారు.
సెప్టెంబర్12న నందిపేటలో ఇంటి నిర్మాణ పర్మిషన్ కోసం సంతోష్ అనే వ్యక్తి నుంచి రూ.8 వేల లంచం తీసుకుంటూ విలేజ్ సెక్రటరీ నవీన్కుమార్ రెడ్హ్యాండెడ్గా దొరికిపోయాడు.
నవంబర్ 8న వర్ని ఎస్ ఐ కృష్ణకుమార్స్టేషన్ బెయిల్ ఇవ్వడానికి నాగరాజ్నుంచి రూ.20 వేల లంచం స్వీకరిస్తూ చిక్కి జైలుపాలయ్యాడు.
నవంబర్14న లింగంపేట పోలీస్ స్టేషన్ పరిధిలో ఒక కేసుకు సంబంధించి రూ.10 లంచం తీసుకుంటూ ఎస్ఐ అరుణ్, కానిస్టేబుల్రామస్వామి ఏసీబీకి పట్టుబడ్డారు.
ఇద్దరికి జైలు శిక్ష
2012లో సీసీ రోడ్పనుల ఎస్టిమేషన్ఇవ్వడానికి కంట్రాక్టర్ అరవింద్ నుంచి రూ.20 వేల లంచం తీసుకుంటూ దొరికిన మున్సిపల్ కార్పొరేషన్ ఏఈ అశోక్ కుశిక్ష పడేలా కోర్టుకు ఆధారాలు సమర్పించారు. కోర్టు అతడికి రెండేండ్ల జైలు శిక్ష, రూ.40 వేల ఫెనాల్టీ విధించింది.
మాక్లూర్ సబ్స్టేషన్ ఏఈ సదాశివ్ ట్రాన్స్ఫార్మర్శాంక్షన్ చేయడానికి రైతు శ్రీనివాస్రెడ్డి నుంచి 2008లో రూ.3 వేల లంచం తీసుకుంటూ ఏసీబీకి చిక్కాడు. కోర్టు అతడికి ఏడాది జైలు, రూ.20 వేల జరిమానా విధించింది.
నిబద్ధతతో డ్యూటీ చేస్తున్నం
సర్కారు ఆఫీస్ల్లో కరప్షన్లేని సర్వీస్లు పౌరులకు అందాలనే నిబద్ధతతో పనిచేస్తున్నం. అవినీతిపరుల ఇన్ఫర్మేషన్ పొందడానికి మేము పాటించే విధానాలు ఫలితాలిస్తున్నాయి. పౌరులు కూడా సహకరిస్తున్నారు. 2022, 2023 కంటే 2024లో కేసులు పెరిగాయి. కొత్త ఏడాదిలో కూడా అంకితభావంతో పనిచేసి రిజల్టు చూపుతాం. మా సేవలు పొందడానికి టోల్ఫ్రీ నంబర్ 1064, సెల్ఫోన్ 91543 88950, 91543 88951, 91543 88953, 91548 88928 లో సంప్రదించాలి- శేఖర్గౌడ్, డీఎస్పీ, ఏసీబీ ఉమ్మడి జిల్లా
